Sveçla dhe Peci në NP "Srbijašume" në Leposaviq: Zyrat ishin të uzurpuara nga strukturat ilegale të Serbisë

Ministrat në mandat teknik, Xhelal Sveçla dhe Faton Peci, vizituan ambientet e ish-Ndërmarrjes Publike “Srbijašume” – Ekonomia Pyjore “Ibar” në Leposaviq.

Këto ambiente janë rikthyer nën administrimin e Agjencisë së Pyjeve të Kosovës,” ka njoftuar në Facebook ministri i Bujqësisë, Pylltarisë dhe Zhvillimit Rural në mandat teknik, Faton Peci.

Sot, në ambientet e dikurshme të kësaj ndërmarrjeje publike është vendosur tabela e Ministrisë së Bujqësisë, Pylltarisë dhe Zhvillimit Rural të Kosovës, Agjencisë së Pyjeve të Kosovës – Zyra e APK-së në Mitrovicë.

Peci në postimin e tij në rrjetet sociale tha se zyrat “ishin të uzurpuara nga struktura ilegale dhe kriminale të Serbisë që vepronin në Kosovë”.

“Në veri – me vepra! Në kuadër të zgjerimit të ligjshmërisë dhe sovranitetit në tërë territorin e Republikës së Kosovës, sot janë ndërmarrë masa për lirimin e zyrave të Agjencisë së Pyjeve të Kosovës, të cilat ishin të uzurpuara nga struktura ilegale dhe kriminale të Serbisë që vepronin në Kosovë. Këto hapësira janë rikthyer nën administrimin e Agjencisë për Pyje të Kosovës”, ka shkruar ai.

Ai shtoi se kjo aksion ishte i domosdoshëm për të siguruar funksionimin e rregullt të stafit të APK-së në përmbushjen e objektivave strategjike dhe ligjore për menaxhimin e duhur dhe parandalimin e prerjeve ilegale të pyjeve në rajonin e Leposaviqit, si dhe për realizimin e detyrave zyrtare në përputhje me mandatin ligjor të kësaj institucioni.