Tomanoviq: Pres vetëm drejtësi nga gjykimi; Petronijeviq: Aktakuza fsheh se krimet ishin të motivuara etnikisht

Kryetarja e Shoqatës së Familjeve të Personave të Rrëmbyer dhe të Zhdukur në Kosovë dhe Metohi, Verica Tomanoviq thotë se pret vetëm drejtësi nga gjykimi i ish-liderëve të UÇK-së në Hagë, shkruan Kurir.

Familjet e viktimave e kanë pritur për më shumë se 20 vjet. Pse iu desh të priste kaq gjatë, kjo është një pyetje e organeve të drejtësisë. Të gjithë do të donin të dinin se ku është fëmija, nëna, babai, i afërmi i tyre. Prandaj presim vetëm drejtësi nga ky proces”, tha ajo.

Avokati Goran Petronijeviq thotë se kundërshtimi i tij kryesor është fakti  se aktakuza e fsheh faktin se të gjitha këto vrasje dhe krime ishin të motivuara etnikisht. 

“Ekziston një fshehje e përhershme e motiveve të atyre vrasjeve, sepse janë vrasje me motive etnike, me vetëm një qëllim - të frikësojnë, eliminojnë dhe dëbojnë popullatën joshqiptare nga Kosova dhe Metohija, në radhë të parë serbët. Nuk ka një gjë të tillë në aktakuzë. Kështu del se të akuzuarit vranë rastësisht dhe se qytetarët e Kosovës vranë njëri-tjetrin, që është një histori absolutisht e çmendur. Pjesa e aktakuzës që përmend kampet dhe ku ka informacione se aty kanë qenë njerëz duhet të hedhë dritë mbi ato ngjarje. Megjithatë, jam i sigurt se kjo nuk do të rezultojë në asnjë akuzë për trafik organesh sepse, përsëri, mungon motivi themelor, dhe kjo është përkatësia etnike e viktimave”, thotë ai. 

Nëse do të ketë vendime fajësie, Petronijeviq beson se kjo do të sjellë kënaqësi të pjesshme për viktimat dhe familjet e tyre.

“Do të ishte e plotë nëse kualifikimi i veprës penale të krimit të luftës, vrasjes dhe dëbimit do të ishte i motivuar etnikisht, dhe e fshehin me këmbëngulje sepse Perëndimi është bashkëkryerës në këtë, por edhe në tregtinë e organeve. Përfshirja e tyre në këtë është arsyeja kryesore e fshehjes dhe shkatërrimit të provave”, tha ai.