Vuçeviq: Sulmi i forcave speciale në QKS “Mitrovica”, përforcimi i terrorit ndaj serbëve

Ministri i Mbrojtjes i Serbisë, Millosh Vuçeviq ka vlerësuar për Kosovo online se sulmi i mëngjesit të sotëm të forcave speciale në QKS “Mitrovica” është vazhdimësi e asaj që kanë bërë autoritetet e Kosovës që nga ardhja e Albin Kurtit në krye të administratës në Prishtinë, duke treguar se është shumë i shqetësuar për atë që do të vijë më pas sepse Kurti nuk do të ndalet së terrorizuari popullin serb me qëllim të spastrimit etnik.

“Ajo që ndodhi sot në mëngjes është vazhdimësi e gjithçkaje që ka bërë Prishtina, jo vetëm në ditët e kaluara, por me javë e muaj, pra që nga ardhja e Albin Kurtit në krye të administratës në Prishtinë. Ajo që na shqetëson janë ndërhyrjet në banesa private dhe ngacmimet e familjeve serbe në veri, dhe veçanërisht sulmi në QKS Mitrovica. Për ta asgjë nuk është e shenjtë, për ta nuk ka mirësjellje, për ta nuk ka respekt për të drejtat e njeriut dhe kam frikë se ky terror ndaj serbëve vetëm sa do të rritet, domethënë do të intensifikohet”, tha Vuçeviq për Kosovo online.

Vuçeviq thekson se Kurti i sheh ngjarjet në Banjskë si një mundësi ideale për të intensifikuar spastrimin etnik të serbëve nga Kosova dhe Metohia.

“Pres që autoritetet e tyre të fillojnë të marrin vendime për konfiskimin e pasurisë së personave të cilët ata i konsiderojnë si rrezik për regjimin e tyre për shkak të rezistencës ndaj spastrimit etnik të popullatës serbe në Kosovë dhe Metohi. Nuk mendoj se do të ndalet dhe jam jashtëzakonisht i shqetësuar për atë që po vjen”, përfundon Vuçeviq.

Një intervistë e madhe me ministrin Vuçeviq, në të cilën ai foli për të gjitha ngjarjet aktuale që kanë të bëjnë me çështjen e sigurisë në Kosovë dhe Metohi dhe shkallën e gatishmërisë së Forcave të Armatosura të Serbisë për të gjitha sfidat që kanë përpara, do ta publikojmë nesër në portalin Kosovo online.