Vuçiq: Gjeorgjia e ruan me sukses të drejtën për qëndrimin e saj; Kobakhidze: Mbështetje e fuqishme për integritetin territorial të Serbisë

Presidenti i Serbisë, Aleksandar Vuçiq, deklaroi sot në një konferencë të përbashkët me kryeministrin e Gjeorgjisë, Irakli Kobakhidze, se një pjesë e madhe e botës po e vëzhgon me vëmendje vendin e tij, i cili po mbron dhe ruan me sukses pavarësinë e vet dhe të drejtën për të pasur qëndrimin e tij. Kryeministri i Gjeorgjisë, Irakli Kobakhidze, theksoi se Gjeorgjia mbështet fuqishëm sovranitetin dhe integritetin territorial të Serbisë.

Vuçiq tha se është i lumtur që është presidenti i parë i Serbisë që ka zhvilluar një vizitë zyrtare në Gjeorgji që nga vendosja e marrëdhënieve diplomatike.

“Ne e konsiderojmë Gjeorgjinë jo vetëm si një popull mik, por edhe si një popull vëlla. Kemi një traditë të gjatë ortodokse dhe jam veçanërisht i lumtur që u prita nga Patriarku i Gjeorgjisë. Nga ai bisedim munda të mësoj shumë dhe të kuptoj orientimin drejt së ardhmes dhe lidhjet që duhet të ndërtojmë”, tha Vuçiq.

Ai shprehu mirënjohjen ndaj udhëheqjes politike të Gjeorgjisë për faktin se gjithmonë kanë kuptuar politikat e njëri-tjetrit.

Vuçiq vlerësoi veçanërisht rezultatet ekonomike të Gjeorgjisë, duke theksuar se ky vend ka arritur suksese të jashtëzakonshme që nga viti 2012.

“Në tremujorin e parë, Gjeorgjia realizoi një rritje ekonomike prej 8,2 për qind. Nuk ka asgjë të ngjashme në Evropë. Ne krenohemi me një rritje prej 3,2 për qind dhe jemi ndër tre vendet e para në Evropë. Këtu po flasim për ngritjen e shpejtë të një vendi. Ne do të përpiqemi të mësojmë nga ju”, theksoi ai.

Lidhur me marrëdhëniet dypalëshe, ai bëri të ditur se shkëmbimi tregtar në katër muajt e parë të vitit është rritur me 36,4 për qind.

Ai tha se me kryeministrin kanë diskutuar për një marrëveshje të tregtisë së lirë dhe shprehu shpresën se Kobakhidze do ta vizitojë Serbinë para aktivitetit “Wine Vision”, kur kjo marrëveshje mund të nënshkruhet më së voni.

“Kjo marrëveshje do të jetë themeli i zhvillimit të përshpejtuar të marrëdhënieve tregtare dypalëshe midis dy vendeve tona”, nënvizoi Vuçiq.

Ai shprehu mirënjohjen që Gjeorgjia ka marrë vendimin për të marrë pjesë në Ekspo 2027.

“Për ne është shumë e rëndësishme që së shpejti të hapim ambasadën në Tbilisi, dhe ajo do të hapet para vizitës së kryeministrit në Serbi. Besoj se edhe pala gjeorgjiane do të marrë një vendim të ngjashëm”, tha Vuçiq.

Ai theksoi se me kryeministrin kanë diskutuar edhe për integrimet evropiane dhe shprehu bindjen se të dy vendet do ta ndihmojnë njëri-tjetrin në këtë rrugë.

Në fund, ai i uroi Gjeorgjisë shumë suksese në të ardhmen, duke theksuar se vendi “është përballur me sukses me të gjitha përpjekjet e shumë faktorëve të jashtëm për ta dobësuar dhe për t’ia zvogëluar kapacitetet”.

Kobakhidze: Mbështetje e fuqishme për integritetin territorial të Serbisë

Kryeministri i Gjeorgjisë, Irakli Kobakhidze, deklaroi se Gjeorgjia mbështet fuqishëm sovranitetin dhe integritetin territorial të Serbisë.

“Vendet tona e kuptojnë shumë mirë rëndësinë themelore të pavarësisë së një shteti dhe mbrojtjes së saj. Jam veçanërisht mirënjohës presidentit Aleksandar Vuçiq për mbështetjen e madhe që i jep sovranitetit dhe integritetit territorial të Gjeorgjisë. Natyrisht, Gjeorgjia mbështet fuqishëm sovranitetin dhe integritetin territorial të Serbisë”, tha Kobakhidze.

Ai theksoi se kjo është vizita e parë e një presidenti serb në Gjeorgji dhe se ajo mund të konsiderohet një moment historik për marrëdhëniet dypalëshe.

“Jam i bindur se kjo vizitë do të jetë një shtysë shtesë për thellimin e marrëdhënieve në të gjitha drejtimet”, shtoi Kobakhidze. Ai gjithashtu deklaroi se, në një kohë kur politika botërore përballet me mungesë liderësh, Serbia ka një lider të jashtëzakonshëm që kujdeset për sovranitetin dhe pavarësinë e vendit, e forcon atë dhe bën gjithçka për ta mbrojtur.

Ai theksoi se Serbinë dhe Gjeorgjinë i lidhin respekti i ndërsjellë, tradita dhe një e kaluar shumë shekullore e krishterë.

“Duhet të theksoj veçanërisht përkushtimin e presidentit Vuçiq për ta bërë Serbinë një vend që kujdeset në mënyrë të qëndrueshme për trashëgiminë fetare dhe kulturore”, shtoi Kobakhidze.

Ai njoftoi se gjatë takimit janë diskutuar tema kyçe dhe paralajmëroi intensifikimin e vizitave dypalëshe.

Sipas tij, vendimi i Serbisë për të hapur ambasadën në Tbilisi është me rëndësi të madhe, pasi do të forcojë më tej marrëdhëniet midis dy vendeve.

“Diskutuam gjithashtu për tregtinë dypalëshe dhe bashkëpunimin në sektorë të ndryshëm. Ekziston një potencial i madh që duhet shfrytëzuar. Po përparojmë në ndërtimin e mirëkuptimit të ndërsjellë, kemi rënë dakord për çështje konkrete dhe jemi të gatshëm të nënshkruajmë një marrëveshje të tregtisë së lirë, e cila është e rëndësishme për zhvillimin e vendeve tona dhe do t’i thellojë më tej marrëdhëniet ekonomike”, tha Kobakhidze.

Lidhur me integrimet evropiane, kryeministri gjeorgjian tha se dy vendet i bashkon një vizion i përbashkët, por edhe sfida të përbashkëta.

“Është shumë e rëndësishme të kemi shkëmbim dypalësh të përvojave dhe bashkëpunim sa më të ngushtë në koordinimin e aktiviteteve në këtë drejtim”, përfundoi Kobakhidze.