Vuçiq me Fico: Qëndrim i palëkundur i Sllovakisë për ruajtjen e integritetit territorial të Serbisë

Presidenti i Serbisë, Aleksandar Vuçiq, u takua këtë mëngjes në Samitin BE–Ballkani Perëndimor në Tivat me kryeministrin sllovak Robert Fico, të cilit i shprehu mirënjohje për mbështetjen e Sllovakisë ndaj rrugës evropiane të Serbisë, si dhe për qëndrimin e fortë dhe parimor të këtij vendi lidhur me ruajtjen e integritetit territorial dhe sovranitetit të Serbisë.

“Një bisedë e përzemërt dhe miqësore me Robert Fico për të ardhmen evropiane të Serbisë, dinamikën aktuale dhe mundësitë për përshpejtimin e procesit të zgjerimit të Bashkimit Evropian, sfidat rajonale dhe avancimin e mëtejshëm të bashkëpunimit ndërmjet vendeve tona”, shkroi Vuçiq në Instagram.

Ai bëri të ditur se kanë shkëmbyer mendime për situatën aktuale politike dhe ekonomike në Evropë dhe rajon, për bashkëpunim më të fuqishëm politik dhe potencialet për rritjen e shkëmbimeve tregtare dhe lidhjen më të fortë të ekonomive të Serbisë dhe Sllovakisë.

“I shpreha mirënjohje Sllovakisë për mbështetjen ndaj rrugës evropiane të Serbisë dhe zbatimit të reformave, si dhe për qëndrimin e saj të fortë dhe parimor kur bëhet fjalë për ruajtjen e integritetit territorial dhe sovranitetit të vendit tonë”, theksoi Vuçiq.

Presidenti i Serbisë po merr pjesë në Samitin BE–Ballkani Perëndimor, i cili po mbahet në Tivat nën sloganin “Prosperiteti dhe stabiliteti i përbashkët i BE-së dhe Ballkanit Perëndimor”.

Para nisjes për në Tivat, ai deklaroi se pret shumë nga ky takim dhe se shpreson të ketë njoftime edhe në lidhje me metodologjinë e procesit të anëtarësimit në Bashkimin Evropian.