Vuçiq me Rubion: Mirënjohje për rolin e SHBA në mbrojtjen e sigurisë së popullit serb në Kosovë

Presidenti i Serbisë, Aleksandar Vuçiq, u takua sonte në margjinat e sesionit të 80-të të Asamblesë së Përgjithshme të Kombeve të Bashkuara në Nju Jork, me Sekretarin e Shtetit të Shteteve të Bashkuara të Amerikës, Mark Rubio. Në bisedë, Vuçiq theksoi se Serbia është e përkushtuar për ruajtjen e paqes dhe stabilitetit, duke shprehur mirënjohje për rolin e SHBA-së në mbrojtjen e sigurisë së popullit serb në Kosovë dhe për kontributin në procesin e dialogut midis Beogradit dhe Prishtines.

"Një bisedë e rëndësishme dhe kuptimplote me Marko Rubion rreth forcimit të dialogut politik midis Serbisë dhe SHBA-së, përmirësimit të bashkëpunimit ekonomik dhe sfidave të përbashkëta të sigurisë", shkroi Vuçiq në Instagram pas takimit me zyrtarin amerikan.

Ai deklaroi se fokusi i bisedimeve ishte në ekonomi dhe tregti, veçanërisht kur bëhet fjalë për zgjidhjen e çështjes së tarifave amerikane.

Në takim u diskutuan mundësitë e investimeve të reja, bashkëpunimi në fushën e energjisë dhe teknologjive të reja, si dhe perspektivat që ofron mekanizmi i dialogut strategjik.

"Gjithashtu theksova se Serbia është e përkushtuar për ruajtjen e paqes dhe stabilitetit, si parakusht për çdo përparim të mëtejshëm dhe një jetë më të mirë për të gjithë qytetarët, duke shprehur mirënjohje për rolin e Shteteve të Bashkuara të Amerikës në mbrojtjen e sigurisë së popullit serb në Kosovë dhe Metohi, si dhe për kontributin e tyre në procesin e dialogut midis Beogradit dhe Prishtines", shkroi Presidenti Vuçiq.

Ai gjithashtu theksoi se Serbia vlerëson mbështetjen e SHBA-së në rrugën drejt anëtarësimit të plotë në Bashkimin Evropian, që është një nga qëllimet strategjike të vendit.

"Një dialog i hapur dhe i ndershëm, i bazuar në besim dhe respekt të ndërsjellë, është mënyra më e mirë për të forcuar partneritetin midis Serbisë dhe SHBA-së. Jam i bindur se marrëdhëniet tona do të fitojnë një vrull edhe më të fortë në të ardhmen, në dobinë tonë të ndërsjellë dhe në interes të paqes, stabilitetit dhe prosperitetit", tha Vuçiq.

Ky është takimi i parë zyrtar midis Vuçiqit dhe Rubios, i cili u zhvillua me iniciativën e Sekretarit të Shtetit të SHBA-së.

Në takim mori pjesë edhe Ministri i Punëve të Jashtme të Serbisë, Marko Gjuriq.

Presidenti Vuçiq kryeson delegacionin serb në sesionin e 80-të të Asamblesë së Përgjithshme të Kombeve të Bashkuara në Nju Jork.