Vuçiq: Perëndimi nuk është i interesuar për AKS, nuk e kanë përmendur për gjashtë muaj

Presidenti serb Aleksandar Vuçiq deklaroi sot se është shumë i shqetësuar për situatën në Republikën Srpska, duke vënë në dukje lëvizjet e fuqive perëndimore gjatë historisë për të rrëzuar të gjitha dokumentet e arritura me Serbinë, përfshirë Marrëveshjen e Dejtonit, por edhe Marrëveshjen e Brukselit nga viti 2013, e cila parashikonte Asociacionin e Komunave Serbe, të cilën, thekson ai, nuk e përmendin më, dhe theksoi se, për shkak të hendekut në rritje ndërmjet SHBA-së dhe Evropës, Serbia duhet të mendojë se si të pozicionohet në botën e re.

"Jam shumë i shqetësuar për situatën në RS. Çdo president i RS, që nga themelimi i saj e deri më sot, është ndëshkuar nga bashkësia ndërkombëtare dhe nuk është e mundur që secili prej tyre të ketë qenë kaq i keq dhe të ketë dashur të shkatërrojë BdheH dhe Marrëveshjen e Dejtonit," u tha Vuçiç gazetarëve në Knjazhevc.

Ai përsëriti se mund të hiqen paralele historike që tregojnë qartë se si vendet perëndimore kanë punuar në dëm të interesave serbe, duke shkelur marrëveshjet e arritura.

Ai kujtoi se dokumenti i Kongresit të Berlinit të vitit 1878 u shkatërrua nga austriakët dhe gjermanët, me aneksimin e Bosnjës dhe Hercegovinës, duke i dhënë ryshfet turqve me 2.5 milionë paund për të heshtur për të.

“Natyrisht, kjo ishte kundër interesave serbe dhe vetëm falë Stojan Novakoviqit arritëm të shmangnim konfliktin me austriakët dhe gjermanët për gjashtë vjet. Dhe kjo na lejoi të ishim fuqia fitimtare në vitin 1918, por ata i shkelën të gjitha marrëveshjet”, theksoi Vuçiq.

Një gjë e ngjashme ka ndodhur, thotë ai, me Rezolutën 1244 të KS të OKB-së në vitin 1999, e cila "ishte sikur të mos kishte ekzistuar kurrë".

“Ata e shkatërruan RFJ-në, përmes politikanëve të paguar serbë, që Kosova të shpallte pavarësinë dhe u shtirën sikur asgjë nuk kishte ndodhur”, shtoi Vuçiq.

Ai po ashtu ka theksuar se gjithçka që është nënshkruar më 19 prill 2013 në Bruksel nuk është zbatuar.

“Çdo gjë që është nënshkruar, nuk kanë zbatuar asnjë pikë. Jo shqiptarët, por Perëndimi dhe BE-ja, sepse janë garantuesit e Marrëveshjes së Brukselit. Atyre nuk u intereson as policia rajonale, as gjyqësori, as prokuroria. Ata nuk janë të interesuar për AKS, nuk e kanë përmendur për gjashtë muaj. Atyre nuk u intereson se çfarë është shkruar sepse nuk është interesi i tyre jetik”, tha Vuçiq.

Ky është rasti, nënvizon ai, me Marrëveshjen e Dejtonit:

"Ai ishte i mirë për t'i dhënë fund luftës në 1995, dhe më pas Perëndimi filloi të shkelte, dhe për 30 vjet ata po shkatrrojn RS-në dhe po ia marrin pushtetet," tha Vuçiç, duke shtuar se pala tjetër në BdheH po e refuzon ftesën e Milorad Dodik për të biseduar sepse nuk janë të interesuar për Dejtonin dhe e dinë se kanë mbështetje për shkatrrimin e mëtejshëm të RS.

Ai deklaroi gjithashtu se një nga shkaqet e luftës në Ukrainë, megjithëse thekson se nuk pajtohet me atë që bënë rusët në fillim, ishte pikërisht se ata “mashtruan” Moskën me Marrëveshjen e Minskut.

“Ne do të japim këtë, do të japim atë, por ata nuk kanë dhënë asgjë, as neve”, ka shtuar presidenti i Serbisë.

Tani, thotë ai, situata është krejtësisht ndryshe, me mesazhin e BE-së që të "lahet me ujë të ftohtë" dhe të kuptojë se sa e rëndësishme është SHBA.

“Parimet tuaja janë të tmerrshme, ne i dimë vlerat tuaja, integritetin territorial... E kemi parë vetë. Shikoni shifrat, të cilat thonë se 50 për qind e forcës totale ushtarake në botë është SHBA, se 30,000 ushtarë amerikanë janë në Gjermani. Për të mos përmendur Prishtinën dhe Bosnje-Hercegovinën, sa të rëndësishme janë SHBA-të për marrëdhëniet greko-turke”, theksoi Vuçiq.

Ai shtoi se Serbia nuk e kuptonte se çfarë po ndodhte me rënien e Murit të Berlinit, por se tani e kishte parë mirë situatën dhe i kishte parashikuar gjërat mirë.

Le të shohim se si Serbia mund të pozicionohet në botën e re

Prandaj, një ditë pas takimit mes presidentit amerikan Donald Trump dhe atij ukrainas Volodymyr Zelensky, ai thekson se hendeku midis SHBA-së dhe Evropës po zgjerohet dhe se Serbia duhet të mendojë se si të pozicionohet në botën e re.

Vuçiq tha se gjithçka që ndodhi disa ditë para takimit parashikoi një rezultat të mundshëm.

Ai kujtoi se Trump dërgoi Sekretarin e tij të financave në Ukrainë dhe se për shkak të një lloj ndalimi të ndihmës, Presidenti Zelensky tha se nuk mund ta priste menjëherë, kështu që priti pesë orë.

“Trump e mori atë si një fyerje të madhe. Pastaj të hënën u votua në OKB, ku ne e morëm anën evropiane në vend që të abstenonim dhe prandaj unë si president kërkova falje dhe thashë se politika e Serbisë duhej të ishte abstenim. E thashë këtë sepse ai votë i përkeqësoi më tej marrëdhëniet mes Evropës dhe SHBA-së, gjë që u pasua me fyerje të mëtejshme. Të nesërmen, Kaia Kallas mbërriti në Uashington ku ishte planifikuar të takohej me Rubio dhe Kellogg, si dhe të shfaqej në Fox News. Të dyja takimet dhe dalja televizive u anuluan. “E gjithë kjo parashikoi një rezultat të mëtejshëm”, theksoi ai.

Vuçiq tha se ajo që mund të shihej mbrëmë ishte një mosmarrëveshje serioze mes SHBA-së dhe Ukrainës, dhe më e rëndësishmja, me gjithë respektin ndaj Ukrainës, jo vetëm një mosmarrëveshje, por një nxitim i evropianëve për t'u përballur më ashpër me SHBA-në.

"Ata nuk pritën deri në mëngjes. Vetëm pak minuta pas takimit, liderët evropianë nga jugu në verilindje ishin në garë për të vendosur se sa më shumë mbështetje do t'i jepnin Zelenskit dhe Ukrainës. Kjo na tregon se hendeku midis SHBA-së dhe BE-së vetëm sa do të zgjerohet. Në këtë moment, disa këtu po gëzohen, duke e konsideruar të mirë që “ariu ka kërcyer në derë” dhe se nuk do të ketë më presion të unifikuar ndaj nesh për shkak të Kosovës dhe Metohisë. Por kjo është vetëm pjesërisht e vërtetë,” shpjegoi ai.

Vuçiq tha se do të pasojnë konflikte më të ashpra dhe se do të ketë një ndarje tjetër në botë.

Evropa, sipas tij, do të përpiqet të paraqitet si një fener i ri lirie, që nuk e përballon dot Trumpin dhe do të përpiqet të organizojë çdo lloj sulmi ndaj presidentit amerikan përmes mediave liberale në SHBA dhe Partisë Demokratike.

“Jam shumë i shqetësuar për të dhe për atë që do të kalojë. Ai atentat ndaj tij nuk u krye nga ndonjë i çmendur apo rastësisht. Koincidenca të tilla nuk ekzistojnë dhe nuk ka aq shumë njerëz të çmendur në botë”, paralajmëroi ai.

Vuçiq iu referua edhe tarifave që Trump shpalli për Evropën.

“Nëse do të vijnë tarifat 25 për qind, patjetër që do të prekemi. Së pari, për shkak të shkëmbimeve të sotme dhe të ardhshme me SHBA. Prej dekadash kemi eksportuar një pjesë të mirë të municioneve nga Prva Partizani në SHBA. Jam i sigurt se do të kërkojnë ta përjashtojnë atë biznes në të ardhmen, por ne do të prekemi për muajt e parë. Le të mos mendojmë se sa e rëndë do të na godasin tarifat nëse industria e automobilave gjermane dhe franceze do të preken dhe do të jenë. Disa qytete dhe qyteza në Serbi mbijetojnë vetëm falë industrisë së automobilave," shpjegoi ai.

Vuçiq tha se tani është e rëndësishme të shihet se ku po çojnë këto marrëdhënie politike dhe nëse është e mundur të rivendoset një partneritet strategjik në Perëndim.

"Unë jam i sigurt se nuk do të vijë deri në vitin e ardhshëm. Shumë fjalë të ashpra janë thënë ditët e fundit dhe SHBA-ja është një fuqi shumë e madhe për t'u tërhequr përpara Evropës," nënvizoi ai.

Vuçiq theksoi se Trump nuk është i rënduar nga historia politike e luftës në Ukrainë, sepse ajo filloi pas mandatit të tij dhe ai mund të thotë çfarë të dojë, ndërsa Evropa nuk mundet.

“Prandaj Evropa është në një situatë të vështirë – Evropa nuk duhet të thotë asgjë ndryshe, për të kapur shansin për paqe, sepse çdo paqe që nuk është fitore për Perëndimin do të jetë një disfatë. Dhe pastaj ata do të kërkojnë se kush është përgjegjës për humbjen. Dhe ky nuk është Trump. Dikush duhet të jetë përgjegjës për qindra mijëra vdekje. Tani ne kemi një përpjekje për të shmangur përgjegjësinë nga ata në Evropë që donin të shkonin në luftë. Kjo është arsyeja pse dikush do ta shtyjë atë më tej. Është shumë e rëndësishme se çfarë do të ndodhë në periudhën e ardhshme. Ne do ta monitorojmë këtë nga afër”, theksoi ai.

Vuçiq tha se do të propozojë një debat të gjerë në Parlament për politikën e jashtme të ardhshme, në mënyrë që të shihet mirë se si Serbia mund të pozicionohet në një botë krejtësisht të re.

"Disa ndryshime do të jenë të përkohshme dhe disa të përhershme. Ne jemi të vegjël, kemi qenë gjithmonë të qëndrueshëm, por do të duhet të kthehemi në drejtimin e duhur, si kur fryn era me vela. Ne do të duhet të marrim parasysh shumë gjëra, interesat tona kombëtare, shtetërore, interesat kombëtare në rajon, si dhe interesat ekonomike, të cilat janë parakusht për realizimin e të gjitha interesave të tjera”, tha Vuçiq.