Zyra për KdheM: Dënimi me burg për Zllatkoviqin është dëshmi se Prishtina vazhdon të shtypë dhe frikësojë serbët

Pasi Gjykata Themelore në Prishtinë e dënoi me pesë muaj burgim Sasha Zllatkoviqin nga Beogradi, i cili u arrestua më 22 korrik në vendkalimin Merdarë kur u nis për të shënuar një çerek shekulli nga vrasja e korrësve serbë në Gracka e Vjetër, ka reaguar Zyra për Kosovë dhe Metohi, duke theksuar se ky vendim është dëshmi se drejtësia e Kosovës ka një qëllim të vetëm - të shtypë dhe frikësojë serbët.

Zyra për Kosovë dhe Metohi rikujton se Zllatkoviqi u arrestua për një ofendim verbal kur shkoi në një turne humanitar futbolli në prag të 25 vjetorit të vrasjes së korrësve serbë në Gracka e Vjetër.

“Gjykata në Prishtinë, natyrisht që nuk i dënon autorët e asaj masakre, por prandaj persekuton të gjithë ata që guxojnë të kujtojnë se ideja separatiste në Kosovë e Metohi ka qenë dhe ka mbetur në thelbin e saj terroriste dhe kriminale. Vrasësit e korrësve serbë sot janë ndoshta figura të shquara në estabilimentin e Albin Kurtit, pasi hero për ta është edhe Azem Kurtaj, i cili, pavarësisht se ka qëlluar gjakftohtësisht fëmijët serbë në prag të Krishtlindjeve, është njeri i lirë”, thuhet në deklaratë.

Prishtina, thekson Zyra për Kosovë dhe Metohi, ka të njëjtën ideologji sunduese për dy dekada e gjysmë - "zhdukjen e popullit serb".

“Strukturat politike dhe gjyqësore në Prishtinë janë thelbi i strukturës kriminale të kryesuar nga Albin Kurti, dhe kushdo që pretendon se në Kosovë dhe Metohi funksionojnë disa institucione të rregullta demokratike, po mohon të vërtetën e dukshme dhe të dhimbshme - se në Prishtinë, shfarosja e popullit serb ka qenë ideologjia sunduese për dy dekada e gjysmë”, thuhet në të.