Zyra për KeM: Prishtina pengon çdo përpjekje për zbardhjen e fatit të serbëve të zhdukur

Zyra për Kosovë dhe Metohi theksoi se puna e sinqertë dhe me qëllime të mira për zbardhjen e fatit të personave të zhdukur gjatë konfliktit në Kosovë, pavarësisht përkatësisë së tyre kombëtare, është një detyrim ndaj njerëzimit dhe ndaj atyre që çdo ditë jetojnë në pikëllim dhe ankth, pa e ditur se çfarë u ka ndodhur më të dashurve të tyre.

Me rastin e Ditës Ndërkombëtare të Personave të Zhdukur, Zyra për KeM rikujton se në Kosovë ende konsiderohen të zhdukur 562 serbë dhe pjesëtarë të komuniteteve të tjera joshqiptare, si dhe se shteti i Serbisë nuk do të heqë dorë kurrë nga kërkesa për zbardhjen e së vërtetës për fatin e tyre.

“U bëjmë thirrje përfaqësuesve politikë në Prishtinë të ndalojnë keqpërdorimin e pamëshirshëm të çështjes së personave të zhdukur dhe, në vend të kësaj, të mundësojnë që, si fillim, të hetohen tetë lokacione për të cilat ekzistojnë informacione të bazuara dhe prova se fshehin mbetjet mortore të serbëve të vrarë”, theksuan nga Zyra për KeM.

Ata theksuan se Beogradi, në kuadër të dialogut të Brukselit dhe Grupit Punues për Personat që Konsiderohen të Zhdukur në Lidhje me Ngjarjet në Kosovë, ka mbajtur gjithmonë një qëndrim konstruktiv, pa bërë asnjë dallim midis personave të zhdukur në bazë të përkatësisë së tyre etnike.

“Por, fatkeqësisht, Prishtina nuk ka treguar as gatishmërinë më të vogël për zbardhjen e fatit të serbëve të zhdukur, por, në vend të kësaj, ka përdorur pengesa, politizim dhe bllokime të kësaj çështjeje thellësisht njerëzore. Deri më sot, Prishtina mohon krimet e organizatës terroriste ‘UÇK’, pengon çdo përpjekje për zbardhjen e fatit të serbëve dhe pjesëtarëve të komuniteteve të tjera joshqiptare të zhdukur dhe parandalon krijimin e një kulture të qytetëruar dhe njerëzore të kujtesës për të gjithë ata që, gjatë konflikteve në Kosovë dhe Metohi, humbën jetën nga dora e terroristëve”, deklaruan nga Zyra për KeM.

Ata shprehën shpresën se bashkësia ndërkombëtare do të tregojë mirëkuptimin aq të nevojshëm, në mënyrë që Prishtina të ndalojë politizimin e çështjes së personave të zhdukur dhe që puna konkrete për gjetjen e tyre të marrë përparësi ndaj keqpërdorimeve të Prishtinës, të cilat, sipas tyre, vetëm sa e zgjasin agoninë e familjeve të personave të zhdukur.