Banorët e Graçanicës me rastin e një viti nga ndalimi i mallrave serbe: Tani blejmë vetëm atë që duhet

Një vit pasi institucionet në Prishtinë ndaluan importin e mallrave serbe, qytetarët e Kosovës qendrore thonë se janë të pakënaqur me cilësinë e produkteve që ofrohen, por edhe me çmimet. Ata theksojnë se blejnë atë që duhet për të mbijetuar, por edhe se është e qartë se serbëve në Kosovë “u ndalohet çdo gjë që është serbe”.

Qeveria e Kosovës vendosi të ndalojë importin e mallrave nga Serbia më 14 qershor 2023. Furnizimet që gjendeshin nëpër tregje dhe dyqane u harxhuan shumë shpejt dhe serbët e Kosovës u detyruan të blejnë produkte më të shtrenjta dhe siç thonë ata të cilësisë më të ulët.

Mirjana Mitiq nga Llapllasella tregon se blen atë që duhet.

“Na mungon cilësia, ajo që jemi mësuar, produktet e qumështit, na mungon “Plazma”, kremi, të gjitha gjërat e mira me të cilat jemi rritur. Tani blejmë atë që duhet dhe sasia është më e rëndësishme se cilësia," tha Mitiq.

“Për sa i përket mallrave mungon gjithçka. Nuk ka qumësht, nuk ke çfarë të blesh thjesht. Çmimet janë në rritje, ne blejmë atë që kemi, çfarë mund të bëjmë tjetër...Kur shkojmë në Serbi blejmë diçka më të mirë, por kjo ndodh rrallë”, tha banori i Graçanicës.

Suzana Komatoviq nga Graçanica thotë se serbët në Kosovë nuk kanë të drejtë për asgjë që është serbe.

“Ky është turp, që ne serbët nuk kemi të drejtë për mallin tonë këtu. Ne ia dalim sa më mirë, blej këtu në Kosovë atë që vjen nga Maqedonia, Greqia, Gjermania, Shqipëria, çfarë ka në dyqane, por fatkeqësisht mallrat serbe nuk gjenden askund në territorin e Kosovës dhe Metohisë. Ne që kemi mbetur të jetojmë në territorin e Kosovës nuk kemi të drejtë për asgjë që është serbe, nuk e dimë pse i shqetësojnë produktet serbe”, tha Komatoviq.

Tamara Gjorgjeviq thotë se, edhe pse blen atë që gjendet në raftet e marketeve dhe dyqaneve, familja është mësuar me një cilësi të ndryshme të mallrave.

"Nuk ka asgjë, për shembull, fëmijët u pëlqen të hanë “Plazma”, por nuk mund ta gjejmë, nuk mund të blihet askund”, ka thënë Gjorgjeviq.