Barometri ballkanik: Më shumë se gjysma e të anketuarve nga Kosova duan të emigrojnë

Emigrimi dhe “ikja e trurit” nga vendet e Ballkanit Perëndimor është një nga problemet më të mëdha për rajonin. Anketa e Barometrit Ballkanik 2023 tregoi se rreth 44 për qind e të anketuarve në rajon duan të largohen nga vendi i tyre, që është pesë për qind më shumë se vitin e kaluar. Tek të rinjtë, kjo përqindje është edhe më alarmante - 71 për qind e të rinjve duan të jetojnë jashtë vendit, larg vendit të tyre të origjinës.

Sipas të dhënave të Barometrit, Kosova kryeson në rajon – ku më shumë se gjysma e të anketuarve, 57 për qind, dëshirojnë të shkojnë.

Më pas vijon Mali i Zi me 45 për qind, Shqipëria me 44, Serbia me 41 dhe Bosnja dhe Hercegovina me 38 për qind.

Të dhënat tregojnë gjithashtu se 59 për qind e të anketuarve besojnë se mbështetja për integrimin evropian në Ballkanin Perëndimor ka rënë.

Individualisht, një perceptim i tillë është më i theksuar në Shqipëri – rreth 92 për qind e qytetarëve mendojnë se mbështetja e BE-së në rajon ka rënë. Në Kosovë, 66 për qind e të anketuarve mendojnë të njëjtën gjë, në Maqedoninë e Veriut 60 për qind, në BeH - 52 për qind dhe në Serbi pak më shumë se një e treta, 34 për qind.

Rreth 60,000 qytetarë dhe 12,000 biznesmenë në Ballkanin Perëndimor morën pjesë në sondazhin e Barometrit Ballkanik, të kryer nga Këshilli i Bashkëpunimit Rajonal (RCC), të cilët iu përgjigjën pyetjeve në lidhje me pritshmëritë e tyre, situatën politike dhe socio-ekonomike në rajon, si dhe qëndrimet e tyre ndaj bashkëpunimit rajonal dhe integrimit të Ballkanit Perëndimor.

Të dhënat tregojnë gjithashtu se qytetarët e Ballkanit Perëndimor e shohin korrupsionin si problemin më të madh për zhvillimin e rajonit dhe 27 për qind e tyre thonë se niveli i korrupsionit është rritur.

Kështu, 38 për qind e qytetarëve shqiptarë të anketuar e shohin vendin e tyre si “më të korruptuarin” në rajon. Në vendin e dytë janë BeH dhe Maqedonia e Veriut, me 26 për qind, e ndjekur nga Mali i Zi dhe Serbia me 25 për qind.

Kosova ka nivelin më të ulët të perceptimit të korrupsionit - 22 për qind.

Në rajon, më shumë se dy të tretat e qytetarëve - 69 për qind e tyre besojnë se ligji nuk vlen për të gjithë njëlloj, dhe kjo është shtatë për qind më shumë se vitin e kaluar.

Të dhënat tregojnë gjithashtu se tre në katër qytetarë të rajonit nuk u besojnë partive politike.