Petkoviq me të zhvendosurit në Kragujevc: Fitorja e Listës Serbe është pengesë ndaj terrorit të Kurtit

Drejtori i Zyrës për Kosovë dhe Metohi, Petar Petkoviq, bisedoi sot në Kragujevc me persona të zhvendosur brenda vendit nga Kosova dhe i ftoi ata që të dalin në mënyrë të bashkuar në zgjedhjet e së dielës, më 28 dhjetor, duke theksuar se ato janë të një rëndësie vendimtare për mbijetesën e popullit serb në Kosovë.

Petkoviq kujtoi se bëhet fjalë për ciklin e tretë zgjedhor për më pak se një vit dhe se është jashtëzakonisht e rëndësishme që të gjithë serbët ta mbështesin në mënyrë të bashkuar Listën Serbe, sepse, siç tha ai, fitorja e kësaj partie nënkupton fitoren e unitetit dhe harmonisë serbe dhe vazhdimin e luftës për interesat shtetërore dhe kombëtare të popullit serb në Kosovë.

“Është veçanërisht e rëndësishme t’u bëjmë thirrje të gjithë serbëve të zhvendosur brenda vendit që jetojnë në Serbinë qendrore dhe që, për shkak të stuhive të luftës dhe rrethanave të tjera, duke ikur nga ekstremistët shqiptarë, kanë gjetur strehë këtu në Serbinë qendrore, si këtu ashtu edhe në Kragujevc, që t’i përgjigjen thirrjes së shtetit të Serbisë dhe të dielën të shkojnë në Kosovë dhe Metohi. Kjo është me rëndësi vendimtare për ne, sepse bëhet fjalë për njerëz që posedojnë dokumente të Prishtinës dhe kështu plotësojnë të gjitha kushtet për të ushtruar të drejtën e tyre të votës në Kosovë dhe Metohi. Është e nevojshme që të gjithë së bashku të votojmë për Listën Serbe, sepse fitorja e Listës Serbe është pengesë ndaj terrorit të Kurtit dhe politikës së tij antiserbe”, theksoi drejtori i Zyrës për KeM.

Ai paralajmëroi se Albin Kurti do të përpiqet me çdo mënyrë në këto zgjedhje që të mbijetojë politikisht, sepse, siç thotë ai, për Kurtin këto zgjedhje janë çështje jete a vdekjeje në kuptimin politik.

Petkoviq tha gjithashtu se Kurti ka edhe njerëz që, sipas tij, vetëm mbajnë emër dhe mbiemër serb, por në thelb nuk kanë asnjë lidhje me interesat kombëtare serbe, me popullin serb në Kosovë, e aq më pak me Beogradin zyrtar dhe shtetin e Serbisë.

“Të tillë si Nenad Rashiq, që e kanë shitur besimin për një darkë, që janë rreshtuar përkrah Kurtit dhe që bëjnë gjithçka për të thyer unitetin serb, nuk e përfaqësojnë popullin serb. Kurti përpiqet ta fusë Rašićin në parlament. Ne duhet t’i fitojmë të gjitha dhjetë vendet e garantuara për përfaqësuesit politikë të popullit serb, ndërsa Lista Serbe është përfaqësuesi i vetëm legjitim politik. Duhet të dëgjojmë presidentin tonë Aleksandar Vučić, i cili në ditët e fundit disa herë u ka bërë thirrje të gjithë serbëve që të dalin dhe ta mbështesin Listën Serbe. Lista Serbe, në fund të fundit, është kordoni kërthizor që e lidh popullin serb në Kosovë dhe Metohi me Beogradin. Lista Serbe është garanci e vazhdimit të ndihmës së gjithanshme financiare dhe çdo ndihme tjetër të shtetit të Serbisë për popullin serb në Kosovë dhe Metohi. Ka shumë arsye pse është e rëndësishme që Lista Serbe të fitojë”, porositi Petkoviq.

Ai shtoi se prej ditësh po bisedon me serbët e zhvendosur në Serbinë qendrore për t’i inkurajuar që të dalin në zgjedhje, edhe pse periudha para festave të Vitit të Ri dhe Krishtlindjeve është sfiduese.

Mbi të gjitha, tha ai, është interesi i Serbisë dhe lufta për një të ardhme më të mirë të popullit serb.

“Ashtu siç shqiptarët u nisën drejt Kosovës dhe Metohisë nga Franca, Zvicra dhe vende të tjera të Evropës Perëndimore dhe erdhën për festat në Kosovë dhe Metohi për të dëgjuar atë që u thotë Kurti, le të organizohemi edhe ne këtu, ta dëgjojmë presidentin tonë. Nuk kemi nevojë të përshkojmë mijëra kilometra, mjaftojnë 200 apo 300 kilometra për të ardhur deri te vendvotimet e para, menjëherë pas vijës administrative, dhe të votojmë, duke treguar se jemi me popullin tonë, se ruajmë unitetin serb dhe se me laps e me politikë të mençur bëjmë gjithçka për të mbrojtur popullin tonë dhe për t’i kthyer shpinën më në fund Albin Kurtit dhe regjimit të tij”, theksoi Petkoviq.

Ai shprehu pritjen që pas zgjedhjeve të hyhet në vitin e ri me më shumë optimizëm, duke falënderuar autoritetet lokale në Kragujevc dhe përfaqësuesit e Partisë Progresive Serbe për mbështetjen dhe organizimin e aktiviteteve në prag të zgjedhjeve.

Takimit me të zhvendosurit në Kragujevc i morën pjesë kryetari i qytetit NikolLa Dashiq dhe komisionerja për personat e zhvendosur Natasha Stanisavleviq.