Stankoviq: Vendimi i KQZ-së është heqje e lirisë së mediave, nuk ka asnjë justifikim

Gazetari i RTV Graçanicës, Zoran Stankoviq, deklaroi se vendimi i Komisionit Qendror të Zgjedhjeve për të refuzuar akreditimin e gazetarëve që raportojnë në gjuhën serbe për ndjekjen e zgjedhjeve lokale, përbën heqje të lirisë së mediave dhe se nuk ekziston asnjë arsyetim që mund të justifikojë një veprim të tillë.

“Çdo ditë habitemi me disa vendime të reja, por ky vendim është më shumë se një befasi, thjesht diçka krejtësisht e papritur. Ajo që është veçanërisht interesante është se gjithmonë kur merret një vendim, jepet edhe një arsyetim pse është marrë. Unë nuk e di saktësisht arsyetimin, por edhe sikur ta dija, mendoj se thjesht nuk ekziston asnjë arsyetim që mund të justifikojë një veprim të tillë,” tha Stankoviq për Kosovo online.

Ai theksoi se vendimi i KQZ-së është heqje e lirisë së mediave.

“Kjo është një dëshmi aq e prekshme, sa që pas kësaj nuk kemi nevojë të themi më asgjë. Por mendoj se edhe Shoqata e Gazetarëve do të reagojë, do t’i drejtohet disa instancave, kështu që llogaris se ndoshta diçka do të ndodhë në dy ditët e ardhshme. Mendoj se bashkësia ndërkombëtare, ose kushdo tjetër, duhet ta dënojë një veprim të tillë,” theksoi Stankoviq.