Arsiq: Trupi gjyqësor dhe prokuroria duan të krijojnë përshtypjen se Gjokoviq është fajtor për të gjitha ngjarjet në Pejë në vitin 1999

Avokati Vasillije Arsiq theksoi se dëshmitari i sotëm në rastin e Millorad Gjokoviqit nuk foli për ngjarjet që përfshihen në aktakuzën e Prokurorisë Speciale dhe se gjatë atyre ngjarjeve madje as nuk ndodhej në Kosovë.

“Dëshmitarët kryesisht janë të instruktuar nga prokuroria që të thonë atë që i përshtatet prokurorit. Dëshmitari i sotëm foli për diçka që nuk ka lidhje me ngjarjet e vitit 1999, madje as nuk ishte i pranishëm gjatë kohës së luftës. Ky dëshmitar dëshmoi vetëm për të krijuar një mjegullnajë, që Gjokoviq të paraqitet paraprakisht si fajtor për diçka që nuk ka lidhje me veprën. Dëshmitari nuk foli për veprën që është objekt i aktakuzës. Ai foli për një lloj frike të tijën, që kishte lënë territorin e Kosovës dhe Metohisë në vitin 1999, por jo për ngjarjet e përfshira në aktakuzë,” tha Arsiq.

Ai deklaroi se pyetjet e prokurorisë dhe të Dhomës Gjyqësore për dëshmitarin ishin të tilla që të krijonin përshtypjen se Gjokoviqi ishte fajtor për të gjitha ngjarjet në Pejë dhe Vitomiricë gjatë vitit 1999.

“Pyetjet e Dhomës Gjyqësore dhe të prokurorisë duhej të krijonin një situatë ku Gjokoviqi ishte fajtor në përgjithësi për gjithçka që ndodhi në Pejë, në Vitomiricë, dhe jo për rastin e mbuluar nga aktakuza”, shtoi Arsiq.

Një tjetër dëshmitar i prokurorisë do të merret në pyetje gjatë ditës, ndërsa gjyqi i Gjokoviqit do të vazhdojë nesër në orën 13:00.