Deputetja e Aleancës e qëlloi Kurtin me vezë, Dehari ndërpreu seancën

Në Kuvendin e Kosovës, me më shumë se një orë vonesë, ka vazhduar seanca konstituive. Pak pas fillimit ndodhi një incident, pas të cilit kryesuesi Avni Dehari e ndërpreu seancën. Lideri i Vetëvendosjes, Albin Kurti, kërkoi sërish kohë shtesë për bisedime. Pas kësaj, deputetja e Aleancës, Time Kadrijaj, e qëlloi me vezë, ndërsa deputetët e Vetëvendosjes u ngritën për ta mbrojtur.

Në fillim, kryesuesi Avni Dehari u kërkoi deputetëve të konfirmonin praninë dhe konstatoi se në seancë ishin të pranishëm 109 deputetë. Më pas, ia dha fjalën liderit të Vetëvendosjes, Albin Kurtit.

Mirëpo, Kurti kërkoi sërish kohë shtesë për konsultime.

„Konsultimet po vazhdojnë dhe ende nuk kemi marrëveshje. Prandaj, kërkoj kohë shtesë në mënyrë që t’i shmangim zgjedhjet e reja“, tha Kurti.

Kjo e revoltoi deputeten e Aleancës, Time Kadrijaj, e cila e qëlloi Kurtin me vezë.

Pas kësaj, deputetët e Vetëvendosjes u ngritën për të mbrojtur liderin e partisë, ndodhi një incident dhe Dehari e ndërpreu seancën. Ai bëri të ditur gjithashtu se deputetët do të njoftohen më vonë për vazhdimin e saj.
 

E para që hyri në sallë ishte deputetja e LDK-së, Vjosa Osmani, ndërsa pas saj hynë edhe deputetët e tjerë të kësaj partie.

Seanca konstituive e Kuvendit vazhdoi në një atmosferë përçarjeje ndërmjet partisë më të madhe në parlament dhe opozitës lidhur me respektimin e Kushtetutës.

Deputetët e opozitës kërkuan dje që seanca të vazhdonte deri në mesnatë, por kjo nuk ndodhi. Ata u mblodhën mbrëmë fillimisht para parlamentit, duke kërkuar mbajtjen e seancës, ndërsa më pas u përpoqën të hynin në sallën e Kuvendit, e cila, megjithatë, mbeti e mbyllur.

Seanca konstituive filloi dy ditë më parë. Deputetët dhanë betimin, por më pas kryesuesi Avni Dehari e ndërpreu, me kërkesë të liderit të Vetëvendosjes, Albin Kurti, i cili kërkoi kohë shtesë për bisedime.

Gjykata Kushtetuese, me vendimin e saj, përcaktoi se parlamenti duhet të konstituohet brenda 30 ditësh nga dita e certifikimit të rezultateve përfundimtare të zgjedhjeve parlamentare. Ky afat skadoi në mesnatë, por ka mbetur një boshllëk juridik, pasi nuk janë përcaktuar pasojat në rast të mosrespektimit të tij.