Gogiq: Duket se askush nuk po nxiton të formojë një qeveri të re

Politologu Ognjen Gogiq thotë për Kosovo online se nuk janë përcaktuar plotësisht të gjitha afatet që kanë të bëjnë me formimin e parlamentit dhe qeverisë në Kosovë, por se i gjithë procesi mund të zgjatet për shkak se nuk ka afate për konfirmimin e rezultateve të zgjedhjeve, pasi Komisioni Qendror i Zgjedhjeve nuk është i detyruar me afate.

KQZ-ja, siç sqaron ai, nuk mund të detyrohet të shpallë rezultatet përfundimtare të zgjedhjeve brenda një afati të caktuar, sepse kjo varet nga procedura të shumta, përfshirë edhe ankesat, duke pasur parasysh se ka mundësi për ankim në Kolegjin e Ankesave Zgjedhore, si dhe në Gjykatën Supreme. Se sa mund të zgjasë e gjithë kjo, thotë ai, është e pamundur të parashikohet.

“Pas konfirmimit të rezultateve, sipas Kushtetutës, Presidenti i Kosovës është i obliguar që brenda 30 ditëve të thërrasë seancën e parë të Kuvendit. Edhe këtu nuk ka një afat të qartë se kur duhet të përfundojë kjo seancë sepse zgjedhja e Kryetarit të Kuvendit mund të marrë pak kohë. Sipas Kushtetutës, partia në pushtet është ajo që propozon kryetarin e Kuvendit, por mund të vijë në një situatë që të mos ketë mbështetjen e opozitës për zgjedhjen e tij dhe pastaj të ndodhë një ngërç”, thotë Gogiq.

Pas përfundimit të konstituimit të parlamentit, shton ai, Presidenti i Kosovës i jep mandat partisë fituese në zgjedhje që të tentojë të formojë qeverinë, por thekson se nuk ka afat që Presidenti ta bëjë këtë.

“Sipas Kushtetutës së Kosovës, mandati nuk i jepet partisë që konfirmon se ka shumicë në parlament, por asaj që ka fituar zgjedhjet dhe ka 15 ditë për të propozuar qeverinë. Nëse dështon, atëherë mandati i jepet partisë së dytë, e nëse dështon edhe zgjedhjet e reja bëhen jo më vonë se 40 ditë pasi konstatohet se nuk është formuar qeveria”, thotë bashkëbiseduesi ynë.

Gogiq po ashtu thekson se atmosfera në Kosovë duket të jetë e tillë që askush nuk po ngutet me formimin e qeverisë së re për disa arsye, e para prej të cilave është se nuk ka shumicë të qartë parlamentare. Të tjerat, thotë ai, janë ndryshimet që ekzistojnë globalisht, dhe administrata e re në Uashington dhe Bruksel, prandaj askush nuk dëshiron të "vrapojë", por ka një dëshirë për të parë se si do të zhvillohen gjërat.

"Kështu që duket se ka pasur një marrëveshje të heshtur për ta zvarritur këtë sa më gjatë që të jetë e mundur dhe më pas ndoshta të shkohet në zgjedhje të reja përpara se dikush të formojë shpejt një qeveri të re. Skenari më i mundshëm është që ky proces të marrë kohë dhe shumica që do të formohet të jetë e paqëndrueshme. Kosova po hyn në një periudhë të krizës parlamentare në të cilën nuk do të jetë e mundur të ketë një shumicë të qëndrueshme në periudhën e ardhshme”, përfundon Gogiq.