Rapajiq: Lista Serbe e demonizuar në shoqërinë kosovare, partnere e padëshiruar për partitë shqiptare

Drejtori programor i OJQ-së Qendra për Avokimin e Kulturës Demokratike nga Mitrovica e Veriut, Aleksandar Rapajiq, vlerësoi se Lista Serbe është “demonizuar në shoqërinë kosovare”, prandaj nuk do të habitej me presione të reja ndaj drejtuesve të kësaj partie para zgjedhjeve lokale të ardhshme.

“Për momentin, Lista Serbe nuk është partnere e dëshiruar për asnjë nga partitë kosovare”, ka deklaruar Rapajiq për Kosovo online.

Ai theksoi prirjen që blloku opozitar ta akuzojë pushtetin për bashkëpunim me Listën Serbe, ndërsa njëkohësisht edhe koalicioni rreth Lëvizjes Vetëvendosje ta akuzojë opozitën për të njëjtën gjë.

“Është e qartë që në shoqërinë kosovare Lista Serbe është demonizuar dhe çdo bashkëpunim me të paraqitet negativisht, si diçka që do t’ia ulë popullaritetin asaj fraksioni që vendos të bashkëpunojë”, saktësoi ai.

Rapajiq kujton se para zgjedhjeve parlamentare të shkurtit kishte pasur njoftime se Lista Serbe do të pengohej të merrte pjesë, dhe mendon se diçka e ngjashme mund të përsëritet edhe për zgjedhjet lokale në tetor.

“Nuk do të habitesha që të ndodhte diçka e ngjashme. Nuk do të kemi atë tentencë për ta penguar Listën Serbe të dalë si parti, por do të ketë sulme ndaj disa personave më të njohur nga Lista Serbe, të cilët do të akuzohen për disa gjëra”, tha Rapajiq.

I pyetur nëse është e mundur të formohet një qeveri e qëndrueshme në Kosovë pa pjesëmarrjen e Listës Serbe, ky analist kujton se qeveria e udhëhequr nga Albin Kurti kishte një mandat të plotë.

"Padyshim që mundet, por kjo nuk është mirë. Kjo nuk është veçanërisht e mirë për popullin serb sepse një pozicion më i mirë i serbëve nuk mund të fitohet nëse ata nuk marrin pjesë në qeveri. Nëse nuk merr pjesë në qeveri, atëherë nuk ke fuqi për të marrë vendime, nuk ke fuqi për të ndryshuar gjërat", theksoi Rapajiq.