Rapajiq: Rezultati i aktgjykimit ndaj krerëve të UÇK-së mund të sjellë protesta ose festime, momenti është i rrezikshëm për serbët

Drejtori i programeve i OJQ-së Qendra për Përfaqësimin e Kulturës Demokratike nga Mitrovica e Veriut, Aleksandar Rapajiq, vlerësoi se vendimi i Dhomave të Specializuara në Hagë në rastin e katër ish-krerëve të UÇK-së të akuzuar mund të shkaktojë reagime në rrugë, përfshirë protesta dhe tubime.

Ai paralajmëroi se mesazhet që u dëgjuan gjatë tubimit në mbështetje të UÇK-së ishin shqetësuese dhe se, përveçse si mesazhe drejtuar bashkësisë ndërkombëtare, ato duhet të shihen edhe si mesazhe drejtuar komunitetit serb.

„Dëgjuam mesazhe mjaft shqetësuese. Mesazhe që i drejtoheshin kryesisht bashkësisë ndërkombëtare, por mund t’i lexojmë edhe si mesazhe drejtuar komunitetit serb. Paralajmërime që katër të akuzuarit në Hagë në asnjë mënyrë të mos shpallen fajtorë, sepse kjo do të shkaktojë reagim“, theksoi ai.

Rapajiq konsideron se reagimi i paralajmëruar mund të përshkallëzohet në trazira, por vë në dukje edhe dimensionin politik të tubimit, përkatësisht luftën e partive politike shqiptare për mbështetjen e votuesve që identifikohen me trashëgiminë e UÇK-së.

„Ai reagim, supozoj, nënkupton një lloj trazirash, por pamë gjithashtu se pati përpjekje që ky tubim të shfrytëzohej për qëllime politike, se ekziston kjo luftë ndërmjet partive politike shqiptare për trashëgiminë e UÇK-së dhe se ato po përpiqen të fitojnë votat e atyre njerëzve që mbështesin trashëgiminë e UÇK-së. Këtu më aktive është PDK-ja, por shohim se edhe Vetëvendosje po përpiqet që në njëfarë mënyre ta tërheqë atë nacionalizëm në anën e vet“, përfundoi ai.

Sipas vlerësimit të tij, reagimi do të pasojë pavarësisht rezultatit të procesit gjyqësor. Rapajiq thotë se, në rast të një aktgjykimi të favorshëm për katër të akuzuarit, mund të ketë festime, ndërsa një aktgjykim eventual dënues mund të shërbejë si shkak për protesta.

„Kështu që, me gjasë, më 16 ose 17 shtator, apo në ditët pasuese, pritet një lloj tubimi dhe proteste nacionaliste ose festimi. Mendoj se duhet të shqetësohemi pikërisht për shkak të situatës në të cilën ndodhet aktualisht e gjithë Kosova. Së pari, askush nuk do të jetë organizator i këtyre tubimeve, kështu që nuk do të mund të akuzoni askënd. Nga ana tjetër, institucionet nuk ekzistojnë, gjithçka është e përkohshme, kështu që, me gjasë, qeveria në detyrë mund të thotë lehtësisht: ‘Epo, ne ishim vetëm qeveri në detyrë’. Gjithçka është përputhur në atë mënyrë që ky moment të jetë i rrezikshëm, veçanërisht për komunitetin serb“, tha Rapajiq.