UNS: Agjencitë e OKB-së në Kosovë shkelin përdorimin e barabartë të gjuhës serbe

Shoqata e Gazetarëve të Serbisë (UNS), së bashku me degën e saj në Kosovë, i ka bërë thirrje UNICEF-it që në llogarinë e tij në Instagram të fillojë të publikojë rregullisht përmbajtje në gjuhën serbe, ashtu siç e bën rregullisht në gjuhën shqipe.

UNS njoftoi se kjo nuk është hera e parë që vërehet se UNICEF-i, një agjenci që merret me mbrojtjen e të drejtave dhe ofrimin e ndihmës për fëmijët në mbarë botën, në faqet e tij në rrjetet sociale i lë jashtë publikimet në gjuhën serbe.

Për këtë, UNS kishte paralajmëruar edhe para dy muajsh.

“Nga fillimi i vitit, UNS ka reaguar disa herë për faktin se disa agjenci të Kombeve të Bashkuara po shkelin Ligjin për përdorimin e gjuhëve, duke u dërguar mediave në gjuhën serbe njoftime dhe informacione vetëm në gjuhën shqipe”, thuhet në njoftimin e UNS-it.

Kujtohet se UNMIK, në buletinin ditor në gjuhën angleze të datës 28 nëntor të vitit të kaluar, ka ndaluar publikimin e teksteve nga mediat në gjuhën serbe dhe shqipe si njësi të pavarura, duke transmetuar që atëherë kryesisht raportime nga mediat në gjuhën shqipe, gjë për të cilën UNS ka protestuar.

UNS në Kosovë atëherë, në një letër drejtuar UNMIK-ut, kërkoi sqarim për këtë vendim dhe theksoi se në këtë mënyrë është prishur balanca e ndjeshme e ndërtuar gjatë dy dekadave të fundit.

Shoqata e Gazetarëve të Serbisë në letër theksoi gjithashtu se UNMIK me këtë veprim ka rrezikuar raportimin e paanshëm, dhe se edhe pas katër muajsh nuk ka marrë përgjigje nga UNMIK-u.

Ndërkohë, siç mëson UNS, UNMIK e ka ndërprerë plotësisht dërgimin e këtij buletini.

Në të njëjtën kohë, kujtohet se autoritetet e Kosovës prej tre vitesh kufizojnë shpërndarjen e shtypit ditor në gjuhën serbe.

UNS edhe një herë thekson se vështirësimi i punës së gazetarëve që raportojnë në gjuhën serbe është i papranueshëm dhe se në këtë mënyrë nuk shkelet vetëm Ligji për përdorimin e gjuhëve, por rrezikohet edhe e drejta për informim e garantuar me konventat ndërkombëtare.