Hoti: Vizita e Von der Leyen konfirmon integrimin e përshpejtuar të Ballkanit Perëndimor, procesi kushtëzohet nga reformat

Ligjëruesi i marrëdhënieve ndërkombëtare dhe gjeopolitikës në Universitetin Mesdhetar në Tiranë, Dritan Hoti, theksoi se vizita e presidentes së Komisionit Evropian, Ursula von der Leyen, në Ballkanin Perëndimor është konfirmim i perspektivës së përshpejtuar të integrimit të rajonit në BE, por se ky proces është i lidhur me reformat.

Hoti tha për Kosovo online se dëgjohen mesazhe për integrim të shpejtë, ndërsa më pas flitet për stagnim. Sipas tij, kjo lidhet me nivelin e reformave të brendshme strukturore në vende të caktuara.

„Vizita është konfirmim i perspektivës së përshpejtuar të integrimit të vendeve të Ballkanit Perëndimor në Bashkimin Evropian. Megjithatë, ekziston fenomeni që herë pas here dëgjohen mesazhe për integrim të shpejtë, ndërsa më pas flitet për stagnim dhe kjo lidhet me nivelin e reformave të brendshme strukturore të vendeve të caktuara, përkatësisht me atë se sa të suksesshme janë këto vende. Shikoni rastin e Malit të Zi, i cili konsiderohet më i avancuar në perspektivën e tij evropiane krahasuar me vendet e tjera, si rezultat i disa reformave apo rezultateve në zhvillimin socio-ekonomik që po arrin si një vend i vogël. Pra, qëndrimi i BE-së është i lidhur me procesin e reformave të brendshme“, deklaroi ai.

Hoti tha se pikërisht reformat e brendshme përcaktojnë qëndrimin e strukturave të caktuara të Bashkimit Evropian.

Sa i përket Serbisë dhe qëndrimit të BE-së ndaj këtij vendi, Hoti theksoi se Serbia edhe sot konsiderohet një vend me rol të veçantë dhe se një çështje e rëndësishme është se si do të trajtohet ajo në aspektin e marrëdhënieve ndërkombëtare, por edhe në kuadër të procesit institucional të integrimit evropian.

„Serbia ka një pozitë të veçantë në Ballkanin Perëndimor. Ajo ka pasur një rol historik në qendrat e fuqisë jashtë Bashkimit Evropian, të cilat kryesisht ndodhen në Moskë, dhe vazhdojnë ta konsiderojnë atë një vend me rol të veçantë në rajonin tonë, por edhe në Evropën Juglindore, përkatësisht në atë që mund ta quajmë pjesa qendrore e Evropës Juglindore. Përbën një problem të madh mënyra se si do të trajtohet Serbia në aspektin e marrëdhënieve ndërkombëtare, por edhe në aspektin e procesit institucional të integrimit evropian. Në rastin e saj, orientimi gjeopolitik, analiza historike e rolit të Serbisë në shpërbërjen e strukturave të vjetra shtetërore (siç ishte Austro-Hungaria), apo e ndikimeve të vjetra në Ballkanin Perëndimor, ndërthuren me procesin institucional të integrimit të këtij vendi në Bashkimin Evropian“, tha Hoti.

Ai pret që të ketë përpjekje ose pritshmëri për t’i vendosur Serbisë kushte, të cilat, siç tha, do të jenë të natyrës gjeopolitike.