Shahini: Gjysmë milion qytetarë janë larguar nga Kosova këtë vit, 90 për qind e tyre janë kthyer

Kryetari i Aleancës së Bizneseve të Kosovës, Agim Shahini, ka theksuar se në vitin kur ka hyrë në fuqi liberalizimi i vizave, gjysmë milioni qytetarë janë larguar nga Kosova për arsye të ndryshme, por se gati 90 për qind e tyre janë kthyer.

Shahini theksoi se liberalizimi i vizave është shumë i rëndësishëm për qytetarët e Kosovës, sepse u mundësoi atyre të udhëtojnë në vendet e BE-së pa shpenzime shtesë për viza.

“Sipas të dhënave tona, më shumë se gjysmë milioni njerëz janë larguar nga Kosova. E kemi fjalën për turistë, punëtorë, studentë, pacientë e të tjerë. Pothuajse 90 për qind e tyre u kthyen. Dhe ata nuk mund ta bënin këtë në 2023. Ky është përparim. Duhet të bëhet progres edhe me vendet e tjera. Nga 1 janari, Kosova do t'i heqë vizat BeH-së, por ai shtet ende beson se nuk duhet të na lejojë të udhëtojmë me letërnjoftim. Këtu kemi shumë probleme me Serbinë, por udhëtojmë me letërnjoftim”, tha Shahini.

Liberalizimi i vizave nuk shkaktoi largim masiv të qytetarëve, thotë Shahini dhe shton se shumë prej tyre janë larguar në kërkim të punës, por shumë janë kthyer. Megjithatë, thekson ai, numri më i madh i nisjeve ka qenë për qëllime turistike.

“Shumë nga qytetarët tanë kanë shkuar në kërkim të punës, kanë tentuar të punojnë ilegalisht, kanë tentuar edhe legalisht dhe shumë prej tyre kanë gjetur punë. Qytetarët kryesisht kanë shkuar si turistë, tek të afërmit e tyre, por janë kthyer”, ka theksuar Shahini.

Sipas tij, para liberalizimit të vizave, qytetarët e Kosovës kanë shpenzuar më shumë se 20 milionë euro për viza.