Gjykata në Hagë nis procedurën për kompensimin e dëmit të viktimave në çështjen kundër udhëheqësve të UÇK-së

Dhomat e Specializuara të Kosovës në Hagë njoftuan sot se do të nisin procedurën për kompensimin e dëmit të viktimave në çështjen kundër ish-udhëheqësve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit, të cilët u dënuan për krime lufte.

Pas shpalljes së aktgjykimit të shkallës së parë, Trupi Gjykues II vendosi që në çështjen Thaçi dhe të tjerët të zhvillojë procedurën për reparacione dhe të nxjerrë një urdhër lidhur me këtë, në përputhje me nenin 22(8) të Ligjit dhe rregullën 168 të Rregullores, në vend që t’i udhëzojë viktimat të ndjekin procedurë civile në Kosovë, me kusht që mbrojtja të mos paraqesë kundërshtim, thuhet në njoftimin e Dhomave të Specializuara.

Kundërshtimet eventuale të kësaj natyre duhet të dorëzohen deri më 22 shtator, ndërsa përgjigjet ndaj tyre nga përfaqësuesi i viktimave dhe Prokuroria duhet të dorëzohen deri më 25 shtator.

Trupi gjykues gjithashtu urdhëroi përfaqësuesin e viktimave që kërkesën për reparacione ta paraqesë deri më 14 tetor, ndërsa Prokuroria dhe mbrojtja duhet t’i dorëzojnë përgjigjet e tyre deri më 4 nëntor.

Në arsyetim thuhet se përfaqësuesi ligjor i viktimave kishte vënë në dukje se të dëmtuarit mund të përballeshin me vështirësi juridike dhe praktike para një gjykate civile në Kosovë.

“Duke marrë parasysh këto konsiderata dhe kontekstin e frikësimit të dëshmitarëve në të cilin janë zhvilluar këto procedura, Trupi Gjykues nuk konsideron se gjykatat civile në Kosovë ofrojnë një rrugë efektive dhe reale që viktimat në këtë çështje të kërkojnë mjete juridike për veprat penale për të cilat të akuzuarit janë shpallur fajtorë”, thuhet në vendim.

Përveç kësaj, trupi gjykues konstatoi se në Kosovë vazhdon të mbizotërojë një klimë frike dhe frikësimi të dëshmitarëve dhe familjeve të tyre, si dhe të personave që kanë dhënë informacione për krimet e kryera nga pjesëtarët e UÇK-së.

Hashim Thaçi dhe Jakup Krasniqi u dënuan dje në shkallë të parë me nga 25 vjet burg secili për krime lufte. Kadri Veseli u dënua me 18 vjet, ndërsa Rexhep Selimi me 13 vjet burg.

Trupi gjykues i shpalli fajtorë Hashim Thaçin, Jakup Krasniqin, Rexhep Selimin dhe Kadri Veselin për krime lufte të kryera ndaj civilëve dhe personave që nuk merrnin pjesë aktive në luftime. Sipas vendimit të trupit gjykues, ata janë fajtorë për krime lufte të privimit arbitrar të lirisë në dëm të 385 personave, trajtim mizor në dëm të 49 personave, torturë në dëm të 303 personave dhe krim lufte të vrasjes në dëm të 96 personave.