Pashiq: Dhomat e Specializuara nuk do t’i gjykojnë serbët, deklaratat e Kurtit janë politikisht të motivuara dhe pa bazë ligjore

Nuk ekziston mundësia që Dhomat e Specializuara në Hagë të gjykojnë pjesëtarë të forcave serbe, vlerësoi avokati dhe ish-prokurori ushtarak Dragan Pashiq, duke theksuar për Kosovo online se pretendime të tilla të kryeministrit të Kosovës në mandat teknik, Albin Kurti, janë të motivuara politikisht dhe të drejtuara për qëllime parazgjedhore, por pa bazë ligjore.

Pashiq sqaroi se Ligji për Dhomat e Specializuara dhe Ligji për Prokurorinë e Specializuar e përcaktojnë qartë juridiksionin e gjykatës.

“Është e vërtetë që nuk përmendet kombësia, por flitet për krime lufte të kryera në periudhën 1998–2000. Duke pasur parasysh se disa gjeneralë serbë të ushtrisë dhe policisë, si dhe drejtues të lartë, tashmë janë përballur me Hagën për vepra penale të kryera në territorin e Kosovës dhe Metohisë, nuk mund të pritet që Dhomat e Specializuara të Kosovës të gjykojnë pjesëtarë të kombësisë serbe që tashmë janë dënuar. Ky fakt është i pakontestueshëm”, tha Pashiq.

I pyetur se për cilat raste e kishte fjalën Albin Kurti kur deklaroi se ato mund t’i kaloheshin Hagës, Pashiq tha se ndoshta bëhet fjalë për aktakuza tashmë të ngritura kundër oficerëve të lartë ushtarakë serbë.

“Para së gjithash mendoj për ish-shefin e sigurisë ushtarake të atëhershëm të Korpusit të Prishtinës, gjeneralin Momir Stojanoviq, si dhe për drejtues policorë, por aktakuza tashmë ka hyrë në fuqi juridike dhe kompetente janë gjykatat e rregullta në territorin e Kosovës dhe Metohisë. Për këtë arsye nuk pritet që ky rast t’i kalojë Hagës apo ndonjë institucioni tjetër ndërkombëtar”, theksoi bashkëbiseduesi ynë.

Duke komentuar deklaratat e kryeministrit në mandat teknik, Albin Kurti, Pashiq thotë se në diskursin publik ai dëshiron t’i paraqesë udhëheqësit kryesorë të UÇK-së, të cilët po gjykohen në Hagë, si viktima të një të ashtuquajturi gjykim mononacional, me qëllim që para zgjedhjeve të sigurojë mbështetjen e votuesve.

“Ai thekson se po gjykohen vetëm shqiptarët. Duhet pasur parasysh se zgjedhjet janë caktuar për 28 dhjetor të këtij viti dhe se ai dëshiron ta sigurojë elektoratin e vet. Është e qartë se në këtë mënyrë përpiqet t’i fitojë votuesit e tij, para së gjithash veteranët e të ashtuquajturës Ushtri Çlirimtare e Kosovës, duke u paraqitur si dikush që gjoja kujdeset për interesat kombëtare të të ashtuquajturës Republikë e Kosovës. Ky është një motiv politik që nuk ka bazë në të drejtë”, shpjegon avokati.

Ai shton se Kurtit i është e qartë se Dhomat e Specializuara janë themeluar për shkak se institucionet gjyqësore të Kosovës nuk kanë qenë në gjendje ose nuk kanë pasur vullnet të ndjekin penalisht kriminelët e luftës.

“E ashtuquajtura Republikë e Kosovës është zotuar për këtë që në vitin 2014, kur ka nënshkruar marrëveshjen ndërkombëtare për themelimin e Dhomave të Specializuara, prandaj nuk pritet që të gjykohen sërish persona tashmë të dënuar. Po ashtu, deri tani do të ishte e njohur për publikun se kush janë autorët e mundshëm të këtyre veprave penale që sanksionohen nga e drejta ndërkombëtare humanitare. Ne nuk kemi informacione të tilla, prandaj nuk priten gjykime të reja”, përfundoi Pashiq.