Një mjet eksploziv është hedhur në lokalin e deputetit të Listës Serbe në Kuvendin e Kosovës në Ranillug

Një mjet eksploziv është hedhur mbrëmë rreth orës 23:00 në lokalin që është pjesë e shtëpisë familjare të anëtarit të Listës Serbe në Kuvendin e Kosovës, Zoran Maksimoviq nga Ranillugu.

Siç ka konfirmuar Maksimoviq për Kosovo online, mjeti eksploziv i dorës është hedhur në kopshtin e lokalit, i cili në atë kohë ishte i mbyllur.

“Ishim me pushime, në shtëpi ishte vetëm vajza, djali doli. Të gjithë e dëgjuan eksplozionin, por nuk e dinin se çfarë ishte dhe askush nuk e pa se kush e bëri atë. Fatmirësisht ka pasur vetëm dëme të vogla materiale. Rasti është raportuar në polici, kanë bërë hetime, ka pasur policë nga Gjilani dhe Prishtina. Hetimi është në vazhdim dhe nuk mund të them asgjë më shumë”, ka thënë shkurt Maksimoviq.

Siç ka thënë ai, kjo ngjarje ka shqetësuar banorët e Ranillugut.