Baraliu: Me masat për Kosovën Serbia shkel ligjin ndërkombëtar

Profesori i së drejtës kushtetuese Mazllum Baraliu ka theksuar se Projektligji për organizimin dhe kompetencën e autoriteteve gjyqësore në ndjekjen e veprave penale të kryera në territorin e Kosovës, i cili është miratuar nga Qeveria e Serbisë, është i paligjshëm, dhe se Kosova tashmë ka një buxhet për asistencë sociale në të cilin janë përfshirë edhe serbët.

Baraliu ka theksuar se Serbia me këto ligje të propozuara shkel të drejtat ndërkombëtare.

“Është njëlloj sikur ne tani të vendosim të ndëshkojmë njerëzit në Porto Riko ose në ndonjë vend tjetër me ndonjë ligj, është e palogjikshme dhe antikushtetuese, sepse cenon juridiksionin e një vendi tjetër. Kosovën e njohin 118 apo 114 shtete dhe kjo nënkupton jo vetëm shkelje të të drejtave, është e papranueshme edhe për Perëndimin, i cili në disa raste sillet në mënyrë burokratike dhe i gjen disa zgjidhje si kompromis, të cilat në fakt nuk janë zgjidhje”, tha Baraliu.

Për masën e ndihmës sociale për serbët në Kosovë, Baraliu thotë se Kosova ka buxhet për përfitime sociale dhe se serbët në Kosovë tashmë kanë një mbështetje nga Serbia.

Ai beson se një vendim i tillë i Serbisë është politik dhe se synimet e saj nuk mund të realizohen.

“Në Kosovë janë 124 kategori që mbulohen në mënyra të caktuara, sa i përket asistencës sociale. Meqenëse Kosova ka buxhet, kështu bëhen punët, nëse mendojmë për komunitetin serb, ata tashmë janë të mbuluar me pako nga Serbia deri në 800 milionë euro, madje edhe më shumë se kaq, por nuk dihet se ku shkon ajo ndihmë, ka ende shumë njerëz nga të gjitha komunitetet që jetojnë në varfëri. Serbia nuk mund ta arrijë këtë, mendoj se është një lëvizje politike”, përfundoi Baraliu.