Bocevski: Një periudhë kritike për rajonin, çdo mbledhje e liderëve kontribuon në qetësimin e tensioneve

Çdo takim i nivelit të lartë ndërmjet presidentëve dhe kryeministrave të Ballkanit kontribuon në zhvillimin e mëtejshëm të rajonit, paqen dhe integrimin evropian, dhe qëllimi i Procesit Brdo-Brioni, përfshirë samitin e nesërm në kryeqytetin e Maqedonisë së Veriut, është pikërisht për të shpejtuar integrimin evropian të Ballkanit Perëndimor, thotë për Kosovo online këshilltari diplomatik në Qendrën për Kërkime dhe Politika të Aplikuara në Shkup, Ivica Bocevski.

Ai posaçërisht thekson se është mirë që nesër përfaqësuesit e Serbisë dhe Kosovës do të takohen në të njëjtën tryezë, vetëm pak javë pas takimit të Aleksandër Vuçiqit dhe Albin Kurtit në Athinë.

“Shpresojmë se kjo do të kontribuojë në uljen e mëtutjeshme të tensioneve në veri të Kosovës”, tha Bocevski.

Ai gjithashtu pret që më në fund të "bisedohet" për përshpejtimin e mundshëm të rrugës evropiane të vendeve të rajonit, e cila mund të dalë përpara Bashkimit Evropian me një qëndrim të përbashkët, sepse, siç duket, rajoni është në një situatë kritike, pasi fokusi është në Ukrainë dhe Moldavi, ndërsa Ballkani Perëndimor duket disi i harruar në Bruksel.

Kur bëhet fjalë për vitin 2030, si viti në të cilin vendet e rajonit mund të anëtarësohen, gjë që u përmend nga Presidenti i Këshillit Evropian, Charles Michel, Bocevski pranon se është pak skeptik kur zyrtarët flasin për data që nuk janë brenda mandatit të tyre, por se ai shpreson që edhe pasardhësi i Michel do ta konfirmojë atë afat.

Ai vëren megjithatë se deklarata e Michel u pasua nga një "kakofoni" në Union.

“Së pari, pas asaj deklarate, Emmanuel Macron na derdhi ujë të ftohtë të gjithëve, kur tha se tani nuk është në tryezë. Dhe kur Franca, një nga motorët e BE-së, ka njëfarë skepticizmi ndaj një date të caktuar, atëherë nuk besoj se është diçka për të cilën mund të flasim”, shtoi Bocesvki, i cili është edhe ish-ambasador i Maqedonisë së Veriut në Brazil.

Megjithatë, ai beson se të gjitha vendet e rajonit janë të përgatitura jo vetëm për fillimin e negociatave, por edhe për anëtarësim në Bashkimin Evropian, duke qenë se procesi po merr shumë kohë, se është “zvarritur” dhe se qytetarët janë lodhur nga bisedat për Unionin.

“Dhe takimi në Greqi ishte një zhgënjim i madh për të gjithë ne. Nga 15 vendet që nënshkruan Deklaratën e Selanikut 20 vjet më parë, vetëm Greqia ishte atje dhe 14 të tjerat jo. Vetë tubimi ishte më shumë një kujtim i trishtë i kohëve të shkuara, në vend të diçkaje që do të ndodhë nesër ose pasnesër”, është përshtypja e Bocevskit.

Nga kjo ai konkludon se për momentin nuk ka konsensus për këtë çështje, por edhe pse nuk është optimisti i parë, ai shpreson se gjërat do të ndryshojnë.

I pyetur nëse Procesi Brdo-Brioni mund ta përmbushë qëllimin e tij, ai përgjigjet se pavarësisht rregullit humoristik se sa më shumë iniciativa - aq më pak frymë e mirë në rajon, çdo takim samit kontribuon në uljen e tensioneve dhe bashkëpunimin rajonal.

“Në këtë kuptim, ne duhet ta mirëpresim këtë iniciativë dhe u takon nikoqirëve të bëjnë diçka që ka një dimension përmbajtjesor të tubimit. Integrimi evropian është filli që vazhdon t'i lidhë vendet e rajonit dhe shpresoj që Maqedonia e Veriut dhe presidenti Pendarovski ta vendosin atë në tavolinë, në mënyrë që vendet që janë në BE, Sllovenia dhe Kroacia, si dhe të tjerat, do të marrin diçka nga ky samit dhe do të përfaqësohet në Bruksel”, tha Bocevski.

I pyetur nëse takimi në Shkup do të jetë mundësi që Vjosa Osmani dhe Steve Pendarovski të flasin për vizitën e fundit të Albin Kurtit në Maqedoninë e Veriut, gjatë së cilës valëviteshin edhe flamujt e “Shqipërisë së madhe”, ai thotë se është mirë që presidentja e Kosovës do të jetë në Shkup, sepse ndoshta të shpjegojë se cili ishte qëllimi i asaj vizite.

“Ajo vizitë mbetet e diskutueshme, po ashtu edhe takimi në Tetovë dhe veçanërisht qëndrimi i autoriteteve maqedonase, sepse Kurti ka marrë të gjithë eskortën e kërkuar me protokoll. Ata duhet t'u shpjegojnë qytetarëve të Maqedonisë së Veriut se çfarë ndodhi rreth asaj vizite, para dhe pas. Prandaj është mirë që Osmani është këtu dhe shpresojmë që ajo të sqarojë qëllimin e atij takimi në Tetovë dhe shpalljen e Kurtit president i të gjithë shqiptarëve në rajon”, tha Bocevski.

Ai vuri në dukje se mesazhe të tilla në Ballkan gjithmonë krijojnë tensione të panevojshme dhe një imazh të keq për të gjithë rajonin dhe reflektojnë veçanërisht keq në marrëdhëniet maqedono-shqiptare brenda Maqedonisë së Veriut, të cilat janë vendimtare për këtë vend.

“Shpresojmë ta mbyllim atë rast, në një mënyrë që i ka hije Maqedonisë dhe Kosovës, në një mënyrë që i ka hije marrëdhënieve tona... Të gjitha tensionet e panevojshme dhe shtrirja e ideve të mëdha shtetërore janë të panevojshme për rajonin. Në Ballkan ekziston një rregull që kushdo që tërhiqte ndonjë projekt të madh shtetëror, përfundonte jetëshkurtër dhe me tragjedi të mëdha, në rajon dhe veçanërisht në popullin e tij. Është një mësim i madh dhe është e panevojshme të përsëritet”, ka përfunduar Bocevski.