Daçiq: Aktgjykimi konfirmoi se UÇK-ja ishte organizatë kriminale dhe terroriste

Burim: Ministarstvo unutrašnjih poslova Srbije

Zëvendëskryeministri i Serbisë dhe ministri i Punëve të Brendshme në detyrë, Ivica Daçiq, deklaroi se aktgjykimi dënues ndaj Hashim Thaçit, Jakup Krasniqit, Kadri Veselit dhe Rexhep Selimit para Dhomave të Specializuara në Hagë përbën konfirmim se “UÇK-ja ishte organizatë kriminale dhe terroriste”, si dhe se ka rrëzuar narrativën për “luftën e saj të drejtë çlirimtare”.

“Aktgjykimi i sotëm dënues ndaj Hashim Thaçit, Jakup Krasniqit, Kadri Veselit dhe Rexhep Selimit para Dhomave të Specializuara në Hagë përbën një konfirmim të qartë, ndonëse të vonuar, të asaj që Serbia dhe populli serb e thonë me zë të lartë prej më shumë se një çerek shekulli – se e ashtuquajtura UÇK ishte një organizatë kriminale dhe terroriste. Kjo është provë juridike se udhëheqësit e saj më të lartë politikë dhe ushtarakë mbajnë personalisht përgjegjësi për mizoritë, vrasjet, rrëmbimet dhe torturat brutale ndaj popullit tonë në Kosovë e Metohi. Me këtë aktgjykim, para opinionit publik botëror, më në fund është rrëzuar narrativa e rreme, e ndërtuar për dekada, për gjoja ‘heronj kombëtarë’ dhe ‘luftë të drejtë çlirimtare’. Ata që fshiheshin pas funksioneve politike sot janë shënuar zyrtarisht dhe përgjithmonë aty ku, sipas nesh, e kanë pasur gjithmonë vendin – në historinë e turpit dhe të krimeve të luftës”, tha Daçiq në një komunikatë.

Megjithatë, ai theksoi se Serbia nuk është plotësisht e kënaqur me aktgjykimin.

“Megjithatë, si shtet dhe popull që ka pësuar sakrifica të mëdha, nuk mund të jemi plotësisht të kënaqur me këtë aktgjykim. Fakti që trupi gjykues hodhi poshtë pikat e aktakuzës që kanë të bëjnë me krimet kundër njerëzimit përbën një manovër politike skandaloze dhe një fyerje të drejtpërdrejtë për të gjitha viktimat e pafajshme. Ky kufizim juridik i aktakuzës është një përpjekje frikacake e drejtësisë ndërkombëtare për të zvogëluar përmasat e vuajtjeve të popullit serb dhe për t’u fshehur përballë planit të dukshëm, sistematik dhe monstruoz të spastrimit të plotë etnik dhe zhdukjes së pranisë serbe në Kosovë e Metohi. Jemi dëshmitarë se as dënimet e shqiptuara – 25 vjet për Thaçin dhe Krasniqin, 18 vjet për Veselin dhe 13 vjet për Selimin – megjithëse të larta, nuk janë dhe nuk mund të jenë kurrë në përpjesëtim me dhimbjen e familjeve që edhe sot kërkojnë eshtrat e baballarëve, vëllezërve dhe fëmijëve të tyre”, tha zëvendëskryeministri i Serbisë.

Ai theksoi se aktgjykimi nuk mund t’i kthejë viktimat e pafajshme dhe as t’i shërojë plagët e popullit serb.

“Ai përbën një paralajmërim historik për Prishtinën dhe sponsorët e saj të huaj se një shtet i rremë nuk mund të ndërtohet mbi varrezat masive të serbëve të vrarë. Republika e Serbisë, e udhëhequr nga krerët e saj shtetërorë, do të vazhdojë me krenari dhe kokëlartë luftën për të drejtën, drejtësinë dhe të vërtetën për vuajtjet e popullit tonë. Nuk do të harrojmë kurrë asnjë vend të vuajtjeve të serbëve dhe nuk do të reshtim kurrë së insistuari për përgjegjësinë e plotë të të gjithë atyre që i kanë lyer duart me gjak në tokën tonë të shenjtë”, përfundoi Daçiq.

Hashim Thaçi dhe Jakup Krasniqi u dënuan sot në shkallë të parë me nga 25 vjet burg secili për krime lufte. Kadri Veseli u dënua me 18 vjet, ndërsa Rexhep Selimi me 13 vjet burg.

Trupi gjykues i shpalli fajtorë Hashim Thaçin, Jakup Krasniqin, Rexhep Selimin dhe Kadri Veselin për krime lufte të kryera ndaj civilëve dhe personave që nuk merrnin pjesë aktive në luftime. Sipas vendimit të trupit gjykues, ata janë fajtorë për krime lufte të privimit arbitrar të lirisë në dëm të 385 personave, trajtim mizor në dëm të 49 personave, torturë në dëm të 303 personave dhe krim lufte të vrasjes në dëm të 96 personave.