Gjuriq bisedoi me Dautin: Serbia insiston në kryerjen e një hetimi me mbikëqyrje të rreptë ndërkombëtare

Ministri i Jashtëm i Serbisë, Marko Gjuriq, ka zhvilluar një bisedë telefonike me ministrin britanik, Stiven Dauti, dhe me atë rast e njoftoi për situatën në Kosovë dhe theksoi se Serbia insiston që të bëhet një hetim me mbikëqyrje të rreptë ndërkombëtare, në mënyrë që të përcaktohet se kush e ka urdhëruar dhe ka kryer sulmin në një objekt vital infrastrukturor në Kosovë, por edhe cili është sfondi politik i kësaj ngjarjeje.

Në njoftimin e Ministrisë së Punëve të Jashtme, theksohet se Gjuriq informoi Ministrin e Shtetit për Evropën, Amerikën e Veriut dhe Territoret Përtej Oqeanit të Mbretërisë së Bashkuar të Britanisë së Madhe dhe Irlandës së Veriut, Stiven Dauti, për qëndrimin e Beogradit në lidhje me "sabotimin e fundit në kanalin Ibër-Lepenac" në komunën e Zubin Potokut.

Gjuriq theksoi se Serbia insiston në kryerjen e një hetimi me mbikëqyrje të rreptë ndërkombëtare për të përcaktuar se kush e urdhëroi dhe e kreu sulmin në një objekt jetik të infrastrukturës në Kosovë, por edhe cili është sfondi politik i kësaj ngjarjeje.

Ministri i Serbisë shpjegoi se Serbia do të ofrojë të gjithë ndihmën e nevojshme për të zbardhur rrethanat dhe hetimet të çojnë tek përgjegjësit dhe tha se partnerët ndërkombëtarë mund të llogarisin në bashkëpunimin e plotë të Serbisë.

“Edhe shefi i diplomacisë serbe me këtë rast paralajmëroi për përpjekjet e Prishtinës që në mënyrë të pabazë dhe pa asnjë provë ta lidh Beogradin me këtë incident, duke theksuar se kjo është një përpjekje tjetër e regjimit të Albin Kurtit për të diskredituar Serbinë dhe për të larguar vëmendjen nga fakti se dhuna e përditshme fizike dhe ligjore ndaj popullit serb në Kosovë dhe Metohi ushtrohet dhe se heqja e të drejtës dhe shtypja e serbëve është institucionalizuar”, thuhet në njoftim.

Gjuriq konkludoi se është shumë e rëndësishme që komuniteti ndërkombëtar, derisa hetimi të japë rezultate të caktuara, të mbështesë përpjekjet e Beogradit për të ruajtur paqen dhe stabilitetin në rajon, “dhe të ndalojë përpjekjet e papërgjegjshme të Kurtit për të përdorur këtë situatë për të vazhduar destabilizimin e rajonit dhe nevojat e tij parazgjedhore”.