KFOR: Ka nisur integrimi i Policisë së Kosovës në arkitekturën e sigurisë së KFOR-it në Manastirin e Deçanit

Misioni i KFOR-it njoftoi se sot ka nisur integrimin e pjesëtarëve të Policisë së Kosovës në arkitekturën e sigurisë së KFOR-it për Manastirin e Deçanit.

Siç thuhet në komunikatë, në përputhje me përmirësimin e situatës së sigurisë në Kosovë, kjo është pjesë e procesit të optimizimit të dislokimit dhe angazhimit të forcave të KFOR-it.

“Ky proces do të jetë gradual dhe do të bazohet në vlerësimin e kushteve, ndërsa po koordinohet me kujdes me një sërë palësh, përfshirë përfaqësuesit e Kishës Ortodokse Serbe dhe të institucioneve në Kosovë, si dhe përfaqësuesit e Policisë së Kosovës dhe të Misionit EULEX”, theksohet nga KFOR-i.

Në komunikatë thuhet gjithashtu se përkushtimi i KFOR-it ndaj sigurisë së Manastirit të Deçanit dhe të të gjitha komuniteteve lokale mbetet i palëkundur dhe i pandryshuar.

“Personeli ynë është dislokuar në mënyrë të përshtatshme dhe është i gatshëm të reagojë ndaj të gjitha zhvillimeve përkatëse, në përputhje me mandatin shumëvjeçar të KFOR-it, i cili buron nga mandati i Kombeve të Bashkuara. KFOR-i mbetet reaguesi i parë kur bëhet fjalë për sigurinë e Manastirit të Deçanit”, thuhet në komunikatë.

Shtohet se KFOR-i do të vazhdojë bashkëpunimin e ngushtë me përfaqësuesit e Kishës Ortodokse Serbe, institucionet në Kosovë, organizatat ndërkombëtare dhe Forcat e Armatosura të Serbisë, me qëllim ruajtjen e transparencës, bashkëpunimit dhe besimit të ndërsjellë, si dhe shmangien e keqkuptimeve.

“Është e rëndësishme që të gjitha palët të marrin pjesë në mënyrë konstruktive në dialog dhe bashkëpunim”, porositën nga KFOR-i.

Në komunikatë rikujtohet gjithashtu se KFOR-i vazhdon ta përmbushë mandatin e tij, të bazuar në Rezolutën 1244 të Këshillit të Sigurimit të Kombeve të Bashkuara të vitit 1999, duke kontribuar në ruajtjen e një mjedisi të sigurt për të gjithë njerëzit që jetojnë në Kosovë, si dhe të lirisë së lëvizjes, në çdo kohë, në mënyrë të paanshme dhe në koordinim të ngushtë me Policinë e Kosovës dhe EULEX-in, në kuadër të roleve të tyre në reagimin ndaj incidenteve të sigurisë.

Më herët gjatë ditës, RTK-ja raportoi se Policia e Kosovës, pas 27 vjetësh, kishte filluar të merrte përgjegjësinë për sigurinë në urën kryesore mbi Ibër, por togeri i Policisë së Kosovës, Erduan Baliqi, deklaroi për Kosovo online se në urë nuk ka asnjë ndryshim.