Lajçak: Ka progres në zbatimin e disa marrëveshjeve ndërmjet Beogradit dhe Prishtinës

Përfaqësuesi special i Bashkimit Evropian për dialogun ndërmjet Beogradit dhe Prishtinës, Miroslav Lajçak, vlerësoi se normalizimi i marrëdhënieve duhet të inkurajojë perspektivën e anëtarësimit në BE, transmeton REL.

"Ne nuk mund të arrijmë normalizimin nëse nuk ka vizion të qartë se si ta lidhim atë me procesin evropian," tha Lajçak duke folur në një forum për Ballkanin Perëndimor të organizuar nga organizata e Brukselit "Miqtë e Evropës".

Duke folur për procesin të cilin e ka ndërmjetësuar për gati katër vite, Lajçak vlerësoi se është çështje me rëndësi strategjike.

Ai konfirmoi se Beogradi dhe Prishtina kanë bërë përparim në disa çështje dhe la të kuptohet se dosja energjetike do të kompletohet së shpejti, se ka progres në çështjen e targave, në çështjen e mungesës së zgjedhjeve lokale në veri, si dhe në hapat drejt zbatimit të marrëveshjes për rrugën drejt normalizimit të marrëdhënieve.

Duke theksuar se është në kontakt të rregullt me ​​partitë, ai paralajmëroi se Kosova dhe Serbia duhet të kenë parasysh kalendarin politik me afrimin e zgjedhjeve evropiane. Sipas tij, do të ishte e mençur që partitë të mos prisnin fushatën elektorale në Bashkimin Evropian.

Që nga prilli i vitit 2020, Miroslav Lajçak ka ndërmjetësuar në dialogun për normalizimin e marrëdhënieve ndërmjet Kosovës dhe Serbisë. Mandati i tij ishte të arrinte një marrëveshje me palët për normalizimin e gjithanshëm të marrëdhënieve.