Lluniq: Përparimi i forcave të KFOR-it është në interes të serbëve në Kosovë

Konsulenti në fushën e gjeopolitikës dhe sigurisë, Nikolla Lluniq, vlerësoi se rikthimi i Sllovakisë në misionin e KFOR-it shkon në favor të sigurisë më të madhe dhe bashkëjetesës së barabartë të komunitetit serb në Kosovë.

„Përmirësimi i kapaciteteve të KFOR-it në Kosovë është në favor të komunitetit serb, sigurisë së tij dhe bashkëjetesës së barabartë me të gjitha komunitetet multietnike“, deklaroi Lluniq për Kosovo online.

I pyetur se si duhet parë pjesëmarrja e Sllovakisë duke pasur parasysh se ajo i përket grupit të pesë vendeve të BE-së që nuk e kanë njohur Kosovën, Lluniq rikujton se nga ai bllok janë pjesë e KFOR-it edhe Greqia dhe Rumania.

„Sllovakia aktualisht ka 42 ushtarë, ndërsa Greqia dhe Rumania nga një kompani secila. Kjo do të thotë se po rriten kapacitetet tona dhe ndërveprimet tona, si politike ashtu edhe ushtarake në kuptimin e marrjes së informacioneve për atë që po ndodh në terren. Dhe kjo është një gjë e shkëlqyer“, tha Lluniq.

Rikthimin e Sllovakisë në KFOR ai e sheh edhe si një lloj fitoreje të udhëheqjes politike serbe.

„Do të duhej të lavdëroja udhëheqjen tonë politike nëse kanë shfrytëzuar marrëdhëniet e mira me krerët e administratës politike sllovake për të siguruar ose të paktën për të apeluar që Bratislava të dërgojë këtë kontingjent. Kjo është një gjë shumë e mirë për serbët në Kosovë“, theksoi Lluniq.
Megjithatë, ai saktëson se Sllovakia për momentin nuk ka fuqinë politike për të ndihmuar ndjeshëm Serbinë.

„Sllovakia për momentin nuk është faktor që do të përmbysë qëndrimin e bashkësisë ndërkombëtare, të ndikojë në ndryshimin e qëndrimit të BE-së apo të NATO-s“, vlerëson Lluniq.

Megjithatë, ai shton se, pavarësisht se sa absurde mund t'u duket disave, aleanca e NATO-s aktualisht ka të njëjtin qëndrim si Serbia në lidhje me formimin e ushtrisë së Kosovës.

"Ajo nuk e mbështet formimin e forcave të armatosura të Kosovës. Përkundrazi, vetëm disa vende e mbështesin atë. Por ne duhet ta marrim parasysh këtë në parashikimin tonë për ngjarjet e ardhshme", thekson Lluniq.

Ai rikujton se në muajin e ardhshëm pritet nënshkrimi i marrëveshjes kornizë për bashkëpunim në fushën e mbrojtjes ndërmjet Prishtinës dhe Uashingtonit.

"Edhe pse kjo nuk do të çojë në integrimin e Kosovës në NATO, do të çojë në rritjen e bashkëpunimit midis Uashingtonit dhe Kosovës, dhe herët a vonë do të paraqesë një problem për ne", paralajmëron Lluniq.