Millivojeviq: Synimi i Kurtit për dominim në veri çon në përshkallëzim

Ish-diplomati Zoran Millivojeviq ka theksuar se betimi i kryetarit të ri të komunës së Mitrovicës të Veriut, Erdan Atiq, me siguri çon në përshkallëzim, transmeton Kurir.

Millivojeviq ka thënë se qëllimi i Kryeministrit të Kosovës Albin Kurti është të arrijë dominimin në veri të Kosovës dhe se mesazhi i rezistencës së serbëve duhet të merret seriozisht.

“Inaugurimi në Mitrovicën e Veriut dhe synimi i Kurtit për ta çuar atë deri në fund, me mbështetjen e Perëndimit, me siguri do të çojë në përshkallëzim. Mesazhi i serbëve se do të rezistojnë nga 1 qershori duhet marrë seriozisht. Synimi i Kurtit është të arrijë dominimin në veri të Kosovës, të sigurojë praktikisht kontrollin e veriut përmes pushtetit lokal dhe policisë së vendosur atje. Interesi i Perëndimit është që ta përdorë këtë mekanizëm për të ushtruar presion shtesë ndaj Serbisë për të njohur të ashtuquajturin realitet, përkatësisht për të marrë pjesë aktive në negociatat për Marrëveshjen e Ohrit dhe për njohjen de facto të Kosovës. Po ashtu ekziston edhe synimi i disa forcave të tjera që përmes destabilizimit të Serbisë, në lidhje me Kosovën e Metohinë dhe vendosjen e sanksioneve kundër Rusisë, të arrihet ndryshimi i qëndrimit dhe politikës së Serbisë”, vlerëson Millivojeviq.

Millivojeviq thotë se në të gjitha këto është i përfshirë një faktor i huaj.

“Nuk është e vështirë ta identifikosh këtë, sepse dihet se kujt nuk i pëlqen qëndrimi serb, që nuk do të vendosë sanksione, mendon vetë dhe nuk do ta dorëzojë Kosovën”, shton Millivojeviq.

Sipas tij, nuk është rastësi që në të njëjtën ditë kur Atiq u betua, në Serbi u tentua një destabilizim i përgjithshëm i vendit me protesta, njoftime për bomba të vendosura dhe gjëra të ngjashme.