Pantiq Pila: Zgjedhjet në Kosovë ishin një operacion politik i parapërgatitur me qëllim eliminimin e Listës Serbe

Në seancën e Asamblesë Parlamentare të Këshillit të Evropës në Strasburg, gjatë debatit mbi raportin e vëzhguesve të zgjedhjeve për Kuvendin e Kosovës të mbajtura më 28 dhjetor 2025, anëtarët e delegacionit të Serbisë vlerësuan se procesi zgjedhor nuk ishte demokratik dhe theksuan, siç pretendojnë, parregullsi të shumta dhe presione.

Shefja e delegacionit serb, Biljana Pantiq Pila, theksoi se procesi zgjedhor ishte një operacion politik i parapërgatitur.

“Zgjedhjet në Kosovë dhe Metohi ishin gjithçka përveçse demokratike. Ishte një operacion politik i parapërgatitur me një qëllim të qartë, të eliminohej Lista Serbe si përfaqësuesi i vetëm legjitim dhe autentik i popullit serb. Albin Kurti ka zbatuar në mënyrë sistematike pengesa të drejtuara ndaj ndalimit të veprimtarisë politike të Listës Serbe. Vetëm pas ankesave të shumta dhe presioneve nga Evropa, Komisioni Qendror i Zgjedhjeve u detyrua të marrë një vendim që mundëson verifikimin e listës”, tha Pila.

Siç shpjegoi ajo, nuk mund të flitet për një proces demokratik zgjedhor në Kosovë dhe kujtoi se 109 persona janë arrestuar për manipulime zgjedhore.

“Pavarësisht gjithë frikësimeve dhe inxhinierisë zgjedhore, Lista Serbe fitoi 10 mandate, por sërish, si herën e kaluar, Kurti i mori një mandat Listës Serbe. Këto zgjedhje do të mbeten të shënuara si shembull se si forma demokratike përdoret për të shfuqizuar thelbin, e thelbi është e drejta e popullit serb në Kosovë dhe Metohi që të ketë përfaqësuesit e vet legjitimë”, tha ajo.

Pila theksoi gjithashtu se zgjedhjet u mbajtën në kushte të dhunës së rëndë dhe të vazhdueshme ndaj popullit serb.

“Që nga ardhja e Kurtit në pushtet, ndaj serbëve janë regjistruar më shumë se 700 sulme të motivuara etnikisht. Rezoluta 1244 e OKB-së nuk respektohet, Marrëveshja e Brukselit nuk respektohet, Bashkësia e Komunave Serbe është vetëm një shkronjë në letër tashmë 13 vjet. Me mbrojtjen e popullit serb në Kosovë dhe Metohi mbrohet e drejta ndërkombëtare dhe Karta e OKB-së. Ju kemi thënë se me mosrespektimin tuaj të së drejtës ndërkombëtare keni hapur kutinë e Pandorës. E drejta ndërkombëtare vlen për të gjithë – për Serbinë, për Danimarkën dhe për Ukrainën, për të gjitha vendet pa përjashtim. Kam frikë se ju ende nuk e keni kuptuar se deri te të gjitha këto konflikte sot na kanë sjellë standardet e dyfishta”, tha Pila.

Aleksandar Mirkoviq, anëtar i delegacionit të Serbisë në APKE, theksoi se zgjedhjet në Kosovë nuk ishin një proces demokratik, por, siç tha ai, “një operacion politik i përgatitur me qëllim shkatërrimin e Listës Serbe, e vetmja listë legjitime dhe autentike e serbëve”.

“Pavarësisht të gjitha presioneve, kërcënimeve dhe pengesave, Lista Serbe fitoi në të gjitha zonat me shumicë serbe, duke siguruar më shumë se 42.000 vota. Sipas rregullave të qarta zgjedhore, ky rezultat nënkuptonte fitimin e të gjitha dhjetë mandateve të garantuara për Listën Serbe në parlament. Megjithatë, Kurti bën inxhinieri politike dhe i merr një mandat Listës Serbe, përmes kontingjentit të votave shqiptare”, tha Mirkoviq.

Këto vota, siç shtoi ai, erdhën nga zona ku praktikisht nuk ka serbë, përfshirë vende nga të cilat serbët janë dëbuar etnikisht në vitin 1999.

“Këto vota shkuan te sateliti i Kurtit, Nenad Rashiq. Zgjedhjet në Kosovë dhe Metohi zhvillohen nën dhunë të rëndë dhe të vazhdueshme kundër popullit serb. Që kur Kurti erdhi në pushtet, ka pasur më shumë se 700 sulme të motivuara etnikisht ndaj serbëve. Këto sulme përfshijnë sulme ndaj fëmijëve serbë, familjeve dhe objekteve të Kishës Ortodokse Serbe, pa një përgjigje adekuate nga bashkësia ndërkombëtare apo institucionet në Prishtinë.”

Politika e standardeve të dyfishta dhe mosrespektimi i së drejtës ndërkombëtare, shtoi Mirkoviq, nuk çojnë në paqe, por thellojnë konfliktin.

“Ju kam thënë se keni hapur kutinë e Pandorës duke ndryshuar me dhunë kufijtë e vendit tim, Serbisë, duke shkelur Kartën e OKB-së dhe duke mos respektuar sovranitetin dhe integritetin territorial të vendit tim. Atëherë nuk ju interesonte. Tani jeni në panik, përsëritni fjalët e mia, duke pyetur se kush do të jetë i radhës. Më vjen keq që do ta kuptoni në mënyrën më të vështirë se ne kishim të drejtë për padrejtësinë historike që i keni shkaktuar popullit tim. Por më vjen mirë që mbështetja për shtetin e rremë të Kosovës tani po ju kthehet si bumerang, më shpejt se sa e prisja. Do ta përsëris edhe një herë: Kosova është Serbi. Nëse për ju nuk është, atëherë nuk keni të drejtë të qani mbi fatin e vendeve të tjera që mund të privohen me dhunë nga territori i tyre”, përfundoi Mirkoviq.

Delegacioni i Kuvendit të Kosovës, i përfaqësuar nga Ardijan Gola dhe Emilia Rexhepi, po merr pjesë në seancën e Asamblesë Parlamentare të Këshillit të Evropës në Strasburg, e cila zgjat deri më 24 prill.
KQZ më 10 dhjetor refuzoi të verifikojë kandidatët e Listës Serbe për zgjedhjet parlamentare që ishin caktuar për 28 dhjetor 2025. Pasuan reagime nga bashkësia ndërkombëtare, Lista Serbe paraqiti ankesë, të cilën Paneli për Ankesa dhe Parashtresa Zgjedhore e miratoi.