Reuters për shpërthimin në Zubin Potok: Nuk ka asnjë provë për përfshirjen e Beogradit

Lajmin për shpërthimin në afërsi të Zubina Potokut e ka transmetuar mbrëmë edhe Reuters, duke theksuar se “nuk janë gjetur prova të drejtpërdrejta për përfshirjen e Beogradit”.

Këtë vlerësim e jep Reuters në përgjigje të deklaratës së kryeministrit të Kosovës, Albin Kurti, i cili e cilësoi shpërthimin e mbrëmshëm, menjëherë pasi ndodhi, si “akt terrorist”.

“Ky është një sulm kriminal dhe terrorist që synon të shkatërrojë infrastrukturën tonë kritike”, tha Kurti në një fjalim televiziv, duke nënkuptuar përfshirjen e palës serbe.

Në tekstin e tij, Reuters vazhdon të apostrofojë pikërisht këtë qëllim të Kurtit:

“Kurti përsëriti fjalët e Presidentes Vjosa Osmani duke akuzuar bandat kriminale serbe pa dhënë prova”, tha agjencia.

Shton se për momentin nuk raportohet për të lënduar, ndërsa shkaku i shpërthimit, i cili ka ndikuar edhe në furnizimin me ujë të pijshëm, është i paqartë.

"Zyrtarët serbë nuk iu përgjigjën kërkesave për koment dhe Reuters nuk gjeti prova të drejtpërdrejta të përfshirjes së Beogradit," shkruan agjencia.