Sellakoviq: Është mirë të dëgjojmë që SHBA janë për KKS, por duhet të shohim edhe veprat e tyre

Ministri i Punës, Punësimit, Veteranëve dhe Çështjeve Sociale të Serbisë, Nikolla Sellakoviq deklaroi sonte se është mirë që mund të dëgjojmë nga përfaqësuesit e SHBA se janë për formimin e Komunitetit të Komunave Serbe, por që nuk mund ta dëgjojmë këtë nga përfaqësuesit e Brukselit.

“Është mirë që dëgjojmë se SHBA-të janë për Komunitetin e Komunave Serbe dhe që thonë se duhet të formohet, por do të doja të shihja edhe disa lëvizje konkrete në fushë”, tha Sellakoviq për TV Pink.

Ai përkujtoi se në prill do të bëhen 10 vjet nga nënshkrimi i Marrëveshjes së Brukselit, e cila përfshin Planin Implementues, pra zbatimi i asaj që ishte nënshkruar dhe në të cilën thuhej gjithçka, deri në hapin e fundit, që duhet të bëjnë Beogradi dhe Prishtina.

"Por, që nga momentin e parë pas nënshkrimit të marrëveshjes, Prishtina bëri gjithçka për të bërë presion ndaj Beogradit që të përmbushë të gjitha obligimet e tij, pa bërë asgjë që është obligim i tyre”, tha Sellakoviq.

Prandaj, thotë ai, është mirë të dërgohen mesazhe, por është koha të shihet se çfarë do të ndodhë nëse Kurti dhe grupi i tij nuk e zbatojnë obligimin për formimin e KKS-së.

“Është indikative që sot ne flasim me përfaqësuesit e Uashingtonit ndryshe nga 10, 15 apo 20 vjet më pare, që është një lavdërim serioz për lidershipin shtetëror dhe presidentin Vuçiq, i cili njihet si një burrë shteti serioz që e mban fjalën. Por, në anën tjetër, Prishtina është ajo që me një sërë aktivitetesh të njëanshme shkatërron dhe shkel gjithçka që është arritur me marrëveshje dhe nuk dënohet asnjëherë”, ka thënë Sellakoviq.

Ai tha se do të ishte mirë të shihej çfarë do të ndodhë me Kurtin për shkak të kësaj, duke vënë re se ndërkohë mund të shihet gjithçka në kundërshtim me atë që pritet – që nga kërkesa për pranimin e Kosovës në Këshillin e Evropës, deri te paraqitja e kërkesës për kandidaturë në BE, liberalizimi i regjimit të vizave për Kosovën.

"Kur e shikoni atë, duket sikur dikush po i shpërblen. Për çfarë?" pyeti ai.

Sellakoviq thotë se është mirë të bisedohet, të vlerësohet fjalët e presidentit të Serbisë, por është gjithashtu e rëndësishme që, më në fund, të shihet se Prishtina është përgjegjëse për diçka dhe se ajo i bartë pasojat për të.

Kjo, shtoi ai, tregon se sa e rëndësishme është që Serbia të qëndrojë konsistente me politikën e paqes dhe këtë, siç thotë ai, duhet ta kuptojë çdo qytetar.

Është gjithashtu fakt, thotë ai, se Marrëveshja e Brukselit përcakton qartë kompetencat dhe autorizimet e Bashkimit të Komunave Serbe, por Kurti e interpreton atë në mënyrën e tij.

“Dhe vetëm duhet të lexojmë marrëveshjen. Kur bëhet fjalë për KKS, thuhet qartë se duhet të ketë autorizime ekzekutive, si dhe fushat specifike në të cilat ai duhet të ketë ato autorizimet ekzekutive. Gjithçka që nuk është shkruar duhet të trajtohet nga ekipi i zbatimit, kush do të hartojë Statutin e KKS-së, i cili duhet të elaborojë se çfarë është shkruar në marrëveshje. Të gjitha interpretimet e tjera, mund të kenë të bëjnë vetëm me atë që nuk është shkruar në marrëveshje. Ajo që është shkruar duhet të përmbushet”, ka thënë Sellakoviq.

Ai shtoi se është sukses për Serbinë kur mund të diskutojë për problemet jetike kombëtare, siç është çështja e Kosovës dhe serbët në Kosovë, me zyrtarë të lartë amerikanë dhe me ata që mbajnë poste të respektuara në administratën e Bidenit.

Sellakoviq po ashtu deklaroi se Serbia prej ditësh po përballet me sulme të shumta ndaj fëmijëve serbë, duke kujtuar sulmin ndaj djemve serbë në natën e Buzmit në Shtërpcë.

“Keni masën e arrestit shtëpiak për të rinjtë në Kllokot me akuzën e dyshuar për të shtëna në natën e Vitit të Ri, një i ri është rrahur në Krishtlindje në Kllokot, kemi pasur të shtëna në një djalë 11-vjeçar, tmerr në Sarajevë, ku fëmijët nga Kroacia këndojnë - "Vrite Serbin", sulme ndaj prindërve. Sot e keni deklaratën e Kurtit në Reçak për 18 aktakuza kundër serbëve për krime të supozuara... Dhe keni një reagim të BE-së për të gjitha këto, në të cilin tërbimi i ustashëve nuk dënohet. Keni një reagim nga përfaqësuesit e BE-së, të cilët flasin për dënimin e Raçakut, për të mos harruar masakrën dhe nuk u shkon mendja të dënojnë neonazizmin dhe ustashët e Jasenovacit”, tha Sellakoviq.

Ai shtoi, se duket se është krim që 44-45 terroristë janë likuiduar në Reçak, dhe nuk është krim që në agresionin e NATO-s janë vrarë 79 fëmijë dhe as që 312 nga gjithsej 437 vende në Kosovë janë spastruar etnikisht nga serbët.

"Edhe ky nuk është krim? Dhe me gjithë këtë, na ndalohet të ndjekim penalisht vrasësit e fëmijëve tanë në Petrovacka cesta”, tha Sellakoviq.