Shtrahe: Kosova ka nevojë për një zgjidhje të modeluar sipas Tirolit të Jugut

Ish-zëvendëskancelari austriak Hajnc-Kristian Shtrahe deklaroi se serbët në Kosovë duhet të kenë një zgjidhje të modeluar sipas Tirolit të Jugut.

“Gjithmonë kam thënë se në Kosovë, për pjesën serbe nevojitet një zgjidhje si në Tirolin e Jugut. Nevojitet autonomi, me të drejta të qarta”, tha Shtrahe për Kosovo online.

Ai është i bindur se vetëm në këtë mënyrë mund të zgjidhet ky problem në mënyrë të qëndrueshme.

"Megjithatë, siç po shoh, ky problem deri më sot nuk është zgjidhur në mënyrë paqësore, dhe unë do të doja që të ishte," shtoi Shtrahe.

Shtrahe, i njohur për qëndrimet e tij pozitive ndaj serbëve dhe Serbisë, dëshiron të rikthehet në politikën austriake.

Ai ka njoftuar se me listën "Team HC Strache" synon të marrë pjesë në zgjedhjet në provincën dhe qytetin e Vjenës, të cilat janë caktuar për 27 prill.

Deri më 27 shkurt, ai duhet të mbledhë mjaftueshëm nënshkrime për të kandiduar me listën e tij, dhe është i bindur se mund ta kalojë pragun zgjedhor dhe të ketë ndikim të rëndësishëm në jetën politike.