Vuçiq: Ta ruajmë unitetin, herën e parë që nuk fiton lista e mbështetur nga Beogradi – nuk do të ketë më serbë në KeM

Presidenti i Serbisë, Aleksandar Vuçiq, sërish sot bëri thirrje për unitetin e popullit serb, duke theksuar se herën e parë kur në Kosovë nuk fiton Lista Serbe ose ndonjë listë tjetër e mbështetur nga Beogradi dhe që bën thirrje për unitet - nuk do të ketë më serbë në Kosovë.

Vuçiq, në Shipovë të Republikës Sërpska, përsëriti se Serbia dëshiron mbi të gjitha paqen, sepse ajo është e domosdoshme për zhvillimin ekonomik.

I pyetur nga gazetarët për përpjekjet për të përçarë popullin serb, Vuçiq tha se gjithmonë ka pasur politikanë që e kanë dëshiruar këtë, sidomos në Beograd, ku sipas tij ka pasur gjithmonë veprimtarinë më të fortë të “agjenturave”.

“Sot e keni Rashiqin, në kuptimin politik, në Kosovë dhe Metohi… Mos harroni një gjë, herën e parë kur Lista Serbe ose ndonjë listë tjetër e mbështetur nga Beogradi, e cila bashkon popullin serb në KeM, nuk merr besimin e qytetarëve, nuk do të kalojnë as dy vjet dhe asnjë serb nuk do të mbijetojë në Kosovë dhe Metohi”, paralajmëroi Vuçiq.

Për këtë arsye ai i përgëzoi serbët në Kosovë që, pavarësisht të gjitha vështirësive, halleve dhe zemërimit, dinë si të sillen për të mbijetuar dhe për të qëndruar në Kosovë.

“Prandaj do të kemi sukses, të gjithë së bashku. Aq sa mundemi të ndihmojmë, në çdo mënyrë, në kushte shumë të kufizuara dhe me duar të lidhura, do të vazhdojmë ta bëjmë këtë. Por duhet ta ruajmë unitetin dhe bashkimin, sepse kjo është me rëndësi vendimtare”, tha Vuçiq.

Lidhur me komentet se mediat rajonale i interpretojnë thirrjet e tij për unitetin e popullit serb si “retorikë nxitëse”, ai u përgjigj se kjo nuk e shqetëson dhe se “gjithçka është vetëm çështje e asaj se deri ku do të justifikohet dikush pa asnjë arsye”.