Rombo: Në pritje të hyrjes në BE, vendet e rajonit duhet të heqin kufijtë e tyre të ndërsjellë

Bashkimi Evropian bazohet në Beneluksin, kur tre vende, Belgjika, Luksemburgu dhe Holanda hoqën kufijtë mes tyre dhe prandaj mendoj se "Ballkani i Hapur" është një nismë e shkëlqyer, theksoi për Kosovo online, Fillip Rombo, pronar i kompanisë bullgare Agropolihim.

“Më kujtohet kur isha fëmijë dhe kur kufijtë u zhdukën, që ne udhëtonim në Holandë vetëm për të kaluar kufirin pa kontroll”, thotë Rombo, i cili mori pjesë në tubimin e “Dialogut Strategjik Ekonomik” në Savudrija, organizuar nga Rrjeti i Zhvillimit të Biznesit të Evropës Juglindore (SEEBDN) nga Vjena.

Ai theksoi se pasi Bullgaria dhe Rumania nuk u pranuan në zonën Shengen, siç ishte planifikuar, në kufij krijohen turma të mëdha, që paraqet një problem të madh për ekonominë.

Siç tha ai, nëse nevojitet kohë që Serbia, Maqedonia e Veriut dhe Mali i Zi të anëtarësohen në Bashkimin Evropian - " atëherë le të fillojmë heqjen e kufijve midis atyre vendeve".

“Nëse të gjithë thoni se jeni gati, atëherë hiqni kufijtë”, tha Rombo.

Ai thekson se kjo sigurisht ka implikime për marrëveshjet e tregtisë së lirë, sepse disa vende kanë më shumë e disa më pak, por, shton ai, duhet bërë një zgjedhje.

"Nëse BE-ja e shtyn integrimin, pra pranimin e Serbisë, Malit të Zi dhe Maqedonisë së Veriut, atëherë duhet të tregoni se mund të arrini një marrëveshje mes jush. Ashtu si vendet e Beneluksit, që mund të jetoni së bashku pa kufij", përfundoi Rombo.