Bajraktari: Procedura për kompensimin e dëmit për viktimat në rastin „Thaçi dhe të tjerët“ është e parakohshme; Hasani: Nuk është e nevojshme të pritet

Avokati Ardian Bajraktari vlerësoi se në këtë fazë është e parakohshme nisja e procedurës për kompensimin e dëmit për viktimat në rastin e katër ish-udhëheqësve të dënuar të UÇK-së dhe se kjo procedurë duhet të fillojë pasi aktgjykimi penal të marrë formë të prerë, ndërsa ish-kryetari i Gjykatës Supreme, Fejzullah Hasani, konsideron se nuk është e nevojshme të pritet vendimi i Gjykatës së Apelit.

Përderisa aktgjykimi mund të ndryshohet në procedurën e shkallës së dytë, sipas vlerësimit të Bajraktarit, nisja e procedurës për kompensimin e dëmit për viktimat është e parakohshme në këtë fazë.

„Si rregull, procedura për kompensimin e dëmit të viktimave fillon pasi vendimi të marrë formë të prerë. Megjithatë, kur bëhet fjalë për Gjykatën Speciale, anomalitë dhe procedurat në kundërshtim me ligjin kanë qenë ato që e kanë karakterizuar vazhdimisht procesin. Konsideroj se një veprim i tillë, përkatësisht një vendim i tillë, është i parakohshëm përderisa ende nuk kemi një vendim të formës së prerë“, tha Bajraktari për KosovaPress.

Sipas tij, vendimi i Gjykatës së Apelit mund të ndryshojë edhe bazën mbi të cilën zhvillohet procedura për kompensimin e dëmit të viktimave.

„Natyrisht, në varësi të rezultatit të vendimit të Gjykatës së Apelit, do të pasojnë edhe veprimet e mëtejshme. Në rast se do të ketë drejtësi, atëherë atë vendim duhet ta anulojë gjykata e shkallës së dytë dhe, rrjedhimisht, natyrisht se edhe ky proces duhet të analizohet. Megjithatë, duhet pritur rezultati i vendimit të Gjykatës së Apelit, për të cilin, duke pasur parasysh rrjedhën që ka karakterizuar vendimmarrjen në procedurat e mëparshme, konsideroj se për rreth dy vjet nuk do të ketë rezultat sa i përket procedurës së shkallës së dytë. Nisja e këtyre procedurave në këtë fazë të procesit mund të rezultojë edhe si paragjykim i procesit“, tha ai.

Ndryshe e interpreton këtë çështje ish-kryetari i Gjykatës Supreme, Fejzullah Hasani, sipas të cilit procedura lidhur me kërkesën pasurore-juridike mund të zhvillohet paralelisht me procedurën penale dhe nuk është e nevojshme të pritet vendimi i Gjykatës së Apelit.

Sipas Hasanit, qëllimi i një procedure të tillë është që viktimat të mund ta realizojnë të drejtën për kompensimin e dëmit në kuadër të procedurës penale, pa qenë të detyruara të iniciojnë një procedurë të veçantë civile.

„Çështja e kompensimit të dëmit për viktimat është e rregulluar me të gjitha ligjet, përfshirë edhe ligjin tonë. Me Kodin e Procedurës Penale parashikohet që në procedurën penale të vendoset edhe për pjesën që ka karakter juridiko-civil, përkatësisht për paditë civile. Qëllimi i mundësimit të realizimit të kësaj të drejte për personat që janë viktima të veprimeve të kundërligjshme është që atyre t’u mundësohet ta realizojnë të drejtën e tyre në procedurën penale, në mënyrë që të shmangen shpenzimet që do të lindnin më pas me inicimin e një kontesti civil. Megjithatë, kërkesa pasurore-juridike zgjidhet njëkohësisht me çështjen penale. Pra, nuk pritet që Gjykata e Apelit të marrë vendim, por për këtë vendoset së bashku me çështjen kryesore“, tha Hasani.

Megjithatë, ai la të hapur mundësinë që Dhomat e Specializuara, për shkak të rregullave të tyre të brendshme dhe specifikave të kësaj procedure, të kenë parashikuar një procedurë të veçantë për reparacionet.

„Mund të ndodhë që me rregullat e tyre të brendshme të kenë parashikuar ndonjë procedurë të veçantë për ndarjen e procedurës. Por, nga ajo që kam parë, kjo do të thotë se për kërkesën pasurore-juridike do të vendoset së bashku me çështjen kryesore. Besoj se në aktgjykimin që do të hartohet do të vendoset edhe për kërkesën pasurore-juridike. Pra, për kërkesën pasurore-juridike vendoset kur shqiptohet aktgjykimi për çështjen kryesore dhe jo pasi vendimi të marrë formë të prerë me vendimin e Gjykatës së Apelit. Sepse edhe ndaj këtij aspekti, përkatësisht kërkesës pasurore-juridike, të akuzuarit kanë të drejtë të parashtrojnë ankesë në Gjykatën e Apelit“, tha ai.

Hasani thekson se baza për kompensimin e dëmit lidhet drejtpërdrejt me aktgjykimin dënues. Nëse i akuzuari lirohet nga akuzat ose aktakuza hidhet poshtë, sipas tij, ndryshon edhe baza për kërkesën pasurore-juridike.

Dhomat e Specializuara të Kosovës në Hagë njoftuan javën e kaluar se do të nisin procedurën për kompensimin e dëmit të të dëmtuarve në çështjen kundër ish-udhëheqësve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, të cilët janë dënuar për krime lufte.