Vuçiq: Ndërprerja e bashkëpunimit me Izraelin mund të vërë në pikëpyetje marrëdhëniet me SHBA

Bartësi i listës “Serbia e Bashkuar”, Aleksandar Vuçiq, ka deklaruar se ndërprerja e bashkëpunimit me Izraelin mund të ndikojë në marrëdhëniet e Serbisë me Shtetet e Bashkuara të Amerikës, duke theksuar se Uashingtoni ndjek me kujdes qëndrimin e vendeve të tjera ndaj Izraelit.

Vuçiq, duke folur për situatën politike dhe të ardhmen e Serbisë, tha se ndihet i poshtëruar dhe keq për faktin se, siç u shpreh, Serbia do të duhet të kalojë nëpër procese të caktuara politike.

“Mua më duket se është kështu, sepse ndihem i poshtëruar, pasi unë jam fajtor që njerëz të tillë na kanë mundur. Ndihem i poshtëruar, ndihem i mjerë, ndihem keq për faktin se Serbia do të duhet të kalojë nëpër të gjitha këto. Disa do të jenë në negociata, ndërsa të tjerë, nga ndonjë kolltuk, pas ndonjë perdeje apo muri, do të përcaktojnë se çfarë mund të bëhet dhe çfarë jo. Rezultati do të jetë shumë i keq, këtë do ta shihni edhe vetë. Unë nuk do t'ju them asgjë”, theksoi Vuçiq.

Duke folur për marrëdhëniet me Izraelin dhe SHBA, Vuçiq paralajmëroi se ndërprerja e bashkëpunimit me Izraelin mund të vërë në pikëpyetje bashkëpunimin me Uashingtonin.

“Kur e ndërprisni bashkëpunimin me Izraelin, kjo do të thotë se do të ketë një pikëpyetje të madhe sa i përket bashkëpunimit me Amerikën, dhe këtë njerëzit duhet ta dinë. Amerikanët gjithmonë e ndjekin qëndrimin tuaj ndaj Izraelit, dhe këtë e di nga bisedat me Marco Rubion, zotin Lando dhe zotin Trump. Shpresoj që ata do ta vazhdojnë dialogun strategjik, pikërisht siç ka thënë edhe Brendan Hanrahan, sepse kjo është e rëndësishme për vendin tonë. Unë dëshiroj sukses, jo dështim, por kur dikush nxiton dhe thotë atë që mendon se u pëlqen njerëzve, pa menduar për fatin e vendit dhe pa e kuptuar se përgjegjësia e tij është pakrahasimisht më e madhe kur drejton shtetin, atëherë jemi në problem. Atëherë jemi në problem”, tha Vuçiq.

Vuçiq foli edhe për vizitën e përfaqësuesve të Listës së Studentëve te peshkopi Teodosije në Graçanicë, duke pretenduar se ata kanë bashkëpunim të mirë me Albin Kurtin, ndërsa atij, siç tha, prej vitesh i është pamundësuar hyrja në Kosovë.

“Kam parë se ata kanë bashkëpunim shumë të mirë me Albin Kurtin, gjë që mund të shihej edhe gjatë pritjes te peshkopi Teodosije në Graçanicë. Unë prej vitesh nuk mund të hyj në Kosovë dhe Metohi, madje as si qytetar. Ata publikuan një komunikatë se Teodosije kishte pritur përfaqësuesit e Listës së Studentëve. Ata e dinin shumë mirë këtë dhe pikërisht për këtë arsye e morën edhe lejen. Për shembull, askush nga familja ime nuk mund të hyjë as privatisht, sepse Albin Kurti nuk e lejon këtë. Ndërsa atyre ua lejon. Prandaj, le të mendojnë njerëzit pse atyre ua lejon, pse Rashiqi i lavdëron aq shumë, ndërsa neve nuk na lejon”, tha Vuçiq.

Ai paralajmëroi se në janar, në Beograd, do të mbahet konferenca e parë ballkanike CPAC, në të cilën, siç tha, do të marrin pjesë persona të afërt me presidentin e SHBA-së, Donald Trump.

“Amerikanët po e organizojnë këtë dhe në janar do të kem kënaqësinë të flas për të. Këta njerëz janë të afërt me presidentin Trump dhe do të ketë më shumë të ftuar. Besoj se dikush nga Qeveria, nëse ajo formohet deri atëherë, do të ftohet për t'i përshëndetur pjesëmarrësit e këtij tubimi. Mendoj se kjo do të jetë shumë e rëndësishme për vendin tonë në aspektin e ideve dhe ideologjisë, veçanërisht sepse do të mbahet këtu në Beograd. Do të kemi mundësinë të flasim për vlerat tradicionale, konservatore dhe familjare, për vlerat e shoqërisë tradicionale, si dhe për të drejtën tonë që të luftojmë për këto vlera”, tha Vuçiq.