Filipoviq për gjykimin e Nadica Çepenkoviqit: Procesverbalet e identifikimit nuk janë përpiluar në përputhje me ligjin
Avokatja Jovana Filipoviq, e cila mbron Nadica Çepenkoviqin, të akuzuar për krime lufte, ka vënë në dukje në seancën e sotme lëshimet në përpilimin e procesverbaleve të identifikimit, duke vlerësuar se gjykata duhet t’i përjashtojë ato nga shkresat e lëndës si prova të papranueshme.
Filipoviq ka deklaruar se sot, në kuadër të këtij procesi, është dëgjuar edhe një dëshmitare, e cila gjatë hetimeve nuk e kishte përmendur emrin e Nadica Çepenkoviqit.
“Sot ajo nuk e la pa e përmendur, megjithëse theksoi se kishte ndodhur vetëm ai një incident në lidhje me të akuzuarën Nadica”, u tha Filipoviq gazetarëve.
Ajo ka theksuar se mbrojtja gjatë seancës së sotme ka vënë në dukje në mënyrë të qartë se dëshmitarët kishin vendosur nënshkrimet e tyre poshtë fotografive të personave që nuk kishin qenë punonjës të burgut. Në këtë mënyrë, siç ka shpjeguar ajo, ata i kishin identifikuar drejtpërdrejt këta persona si përgjegjës për keqtrajtimin e të paraburgosurave, duke e konfirmuar këtë me nënshkrimet e tyre në procesverbalet e identifikimit.
Sipas saj, mbrojtja ka arritur t’ia bëjë të qartë trupit gjykues mënyrën se si është zhvilluar procedura e identifikimit.
“Ne, si mbrojtës, deri më tani kemi theksuar disa herë se dëshmitarët ose janë udhëzuar paraprakisht, ose u është treguar fotografia e saktë nën të cilën duhet të nënshkruhen gjatë procedurës së identifikimit, dhe se kjo procedurë nuk është zhvilluar në përputhje me ligjin. Shpresojmë që gjykata, në përfundim të këtij procesi, të marrë një vendim që do të bazohet në ligj dhe jo nën presionin e opinionit publik, si dhe që të gjitha këto procesverbale të identifikimit të përjashtohen nga shkresat e lëndës si prova të papranueshme”, ka deklaruar Filipoviq.
Nadica Çepenkoviq dhe Boban Toniq, ish-roje të burgut në Lipjan, janë arrestuar më 21 prill 2025, ndërsa aktakuza kundër tyre është ngritur më 31 dhjetor të po atij viti.
Sipas aktakuzës, ekziston dyshimi i bazuar se Çepenkoviq, gjatë viteve 1998 dhe 1999, si roje në burgun e Prishtinës dhe në burgun paralel për gra në Lipjan, në bashkëkryerje me zyrtarë të tjerë të burgut, ka shkelur rregullat e së drejtës ndërkombëtare gjatë konfliktit.
Në seancën përgatitore para Departamentit Special të Gjykatës Themelore në Prishtinë, në shkurt të këtij viti, Çepenkoviq është deklaruar e pafajshme për veprën penale për të cilën akuzohet nga prokuroria.
0 komentet