Gjuriq: Kurti me vetëdije dhe paturpësisht sfidon BE dhe përpjekjet e saj për të stabilizuar Ballkanin Perëndimor

Duke folur për ndërhyrjen e fundit të Policisë së Kosovës në ambientet e Ujësjellësit Rajonal në Zubin Potok, Ministri i Punëve të Jashtme i Serbisë, Marko Gjuriq, theksoi se përgjigjja e Albin Kurtit ndaj thirrjes së Presidentit të Këshillit Evropian, Antonio Koshta, për deeskalim, është në fakt një vazhdim i përshkallëzimit.

Gjuriq, në rrjetin social “X”, theksoi se, vetëm një ditë pasi Presidenti i Këshillit Evropian, Antonio Koshta, tha se pret që Prishtina të marrë pjesë në normalizimin e marrëdhënieve me Beogradin përmes një dialogu konstruktiv dhe shprehu shpresën se veprimet e njëanshme të regjimit Kurti në veri të Kosovës nuk janë një trend, po dëshmojmë një tjetër sulm shqetësues ndaj stabilitetit të rajonit.

"Përfaqësuesit e institucioneve të përkohshme të Prishtinës hynë me forcë në objektin e Ujësjellësit Rajonal në komunën me shumicë serbe të Zubin Potokut sot, duke rrezikuar kështu funksionimin e një sistemi jetësor komunal, nga i cili varet jeta e serbëve në veri të Kosovës dhe Metohisë. Përgjigja e Kurtit ndaj thirrjes së Koshtës për deeskalim është, pra, një vazhdim i përshkallëzimit, dhe është mjaft e qartë se kjo është një sfidë e vetëdijshme dhe e paturpshme ndaj Bashkimit Evropian dhe përpjekjeve të tij për të stabilizuar kushtet në Ballkanin Perëndimor", shtoi Gjuriq.

Ai përsëriti se e vetmja mënyrë për të parandaluar shkeljen sistematike të të drejtave themelore të njeriut të serbëve në Kosovë - është formimi i menjëhershëm i Asociacionit të Komunave Serbe, për të cilin Prishtina u zotua 12 vjet më parë.

“Në vend që të përmbushë detyrimet, Kurti po sulmon sistemet serbe të shërbimeve në veri të Kosovës dhe Metohisë, edhe pse ishte rënë dakord që këto sisteme do të ishin nën autoritetin e drejtpërdrejtë të Asociacionit të Komunave Serbe”, përfundoi Gjuriq.