Gogiq: Arrestimet në Zubin Potok shqetësuan banorët, bashkësia ndërkombëtare duhet të jetë në terren

Politologu Ognjen Gogiq thotë se arrestimet e djeshme të nëntë serbëve në Zubin Potok i kanë shqetësuar edhe më shumë banorët e kësaj komune, të cilët, për shkak të aksioneve të shpeshta policore, jetojnë me frikë dhe pa informacione të mjaftueshme për atë që po ndodh.

„Policia kishte ardhur atje edhe disa muaj më parë, kishte marrë në pyetje banorët, kishte ndaluar disa prej tyre dhe disa i kishte liruar. Dje u zhvillua operacioni më intensiv i policisë, gjatë të cilit u arrestuan nëntë banorë. Ngjarja e djeshme, por edhe të gjitha këto ngjarje që po zgjasin prej disa muajsh, kanë shkaktuar mjaft shqetësim te popullsia lokale, sepse ata në fakt nuk e dinë se për çfarë bëhet fjalë, çfarë po ndodh aty, çfarë pret policia prej tyre dhe çfarë mund të presin ata vetë. Dhe, nga fjalët e tyre, dëgjoj se thonë se asgjë nuk mund t’i befasojë, se presin që gjatë natës dikush mund t’u trokasë papritur në derë, se nuk kanë asnjë lloj parashikueshmërie apo informacioni për atë që mund të pasojë“, tha Gogiq, i cili dje vizitoi fshatrat në zonën e Malit të Moknës, në komunën e Zubin Potokut, ku jetojnë të arrestuarit dhe ku janë gjetur varreza masive.

Meqenëse bëhet fjalë për një hetim lidhur me krime të pretenduara të luftës, Gogiq thotë se organet kompetente kanë detyrimin të zhvillojnë hetime, por se duhet pasur kujdes që operacionet të zhvillohen në mënyrë të tillë që të shqetësojnë sa më pak popullsinë lokale.

„Policia po përpiqet që përmes tyre të mësojë, të sigurojë disa informacione, megjithëse bëhet fjalë për një periudhë të gjatë që ka kaluar nga konflikti i armatosur, pas kohës kur me gjasë është kryer krimi i luftës në atë zonë. Për më tepër, ai terren është shumë specifik, pra male, pyje dhe zona të egra“, vëren ai dhe shton se, pikërisht për shkak të strukturës së fshatrave, shumë banorë nuk janë të njohur me rrethanat e ngjarjeve që mund të kenë ndodhur disa dekada më parë.

Siç thekson ai, njëri nga të arrestuarit në kohën e ngjarjeve të luftës ishte vetëm 15 vjeç, prandaj, siç thotë, shtrohet pyetja se çfarë mund të dijë një person i tillë.

„Nuk ekziston besimi i popullsisë ndaj policisë. Në atë zonë është regjistruar incidenti me Nenad Rashkoviqin. Ekziston domosdoshmëria që këto ngjarje të hetohen, të zhvillohen hetime dhe të përcaktohen rrethanat, por njëkohësisht duhet punuar që kjo popullsi të shqetësohet sa më pak. Njerëzit atje jetojnë në një lloj izolimi, ka shumë të moshuar dhe kjo vërtet krijon shqetësim të madh tek ata. Për sigurinë e popullsisë, bashkësia ndërkombëtare duhet të përfshihet në një masë më të madhe dhe përfaqësuesit e saj të jenë në terren kur zhvillohen operacione të tilla“, porosit Gogiq.

Megjithatë, në masën që kjo nuk e rrezikon hetimin, popullsia duhet të informohet për planet dhe synimet e institucioneve kompetente, konsideron ai, në mënyrë që të shmangen frika dhe pasiguria për shkak të ngjarjeve të mundshme në të ardhmen.

„Situata është shumë delikate, sepse vërtet janë gjetur mbetje mortore dhe ekzistojnë dyshime serioze se është kryer një krim lufte. Por, nga ana tjetër, kjo duhet të balancohet me nevojën për të mbrojtur popullsinë që jeton sot atje dhe që është shumë e cenueshme. Duhet vepruar me shumë kujdes“, përfundon ai.