Grubeshiq: Negociatori i ardhshëm i BE do të jetë më dashamirës për Prishtinën, qëllimi është pavarësia e plotë e Kosovës

Aleksa Grubeshiq nga Qendra për Stabilitet Social thotë për Kosovo online se është bërë e qartë se negociatori i ri i BE-së për dialogun ndërmjet Beogradit dhe Prishtinës do të vijë nga një vend që e njeh Kosovën. Ai shton se nuk pret shumë prej tij dhe beson se një iniciativë më e madhe e SHBA-së mund të sjellë rezultate më të mira sesa qendrimi i BE.

“Duke pasur parasysh që Komisioneri për Punë të Jashtme dhe Politikë të Sigurisë është ish-kryeministrja e Estonisë Kaja Kallas, mund të pritet që negociatori i ardhshëm të jetë nga një vend që e njeh Kosovën, ndryshe nga Sllovakia prej nga është Lajçak”, thotë Grubeshiq.

Ai thekson se një zgjedhje e tillë dërgon një sinjal të qartë për politikën e Bashkimit Evropian ndaj çështjes së Kosovës.

“Përveç njohjes së pavarësisë së Kosovës nga Estonia, Kallas personalisht ndjek një agjendë në të cilën politika e Kosovës së pavarur duhet të zbatohet deri në fund me çdo kusht dhe se ky dialog duhet të çojë ekskluzivisht në fitimin e pavarësisë së plotë të Kosovës”, shpjegon analisti.

Grubeshiq adresoi edhe pyetjen nëse zgjedhja e një negociatori të ri mund të sjellë përparim në dialog.

“Nuk do të thosha se për Serbin do të ndryshojë diçka, të paktën nuk do të sjellë asgjë të mirë. E kam fjalën, natyrisht, për Brukselin. Ajo që unë pres më shumë në këtë rast është një ndryshim në politikën e Uashingtonit, ose që ndoshta një nga negociatorët e tyre dhe iniciativa politike e Trump do të çojë në disa përmirësime," tha ai.

Ai kujtoi periudhën kur i dërguari i posaçëm i Presidentit Trump, Richard Grenell, luajti një rol të rëndësishëm në dialogun midis Beogradit dhe Prishtinës, i cili, sipas tij, pati një ndikim pozitiv në situatën.

“Kjo është diçka që u shkon për shtat serbëve, sepse ne jemi pala që përmes Ballkanit të Hapur po inicojmë të zgjidhim gjithçka përmes ekonomisë dhe t'i lëmë mënjanë këto konflikte, të shohim se si mund ta normalizojmë situatën, t'u japim të gjithë qytetarëve, edhe për serbët edhe për shqiptarët, të bëhet më mirë”, thotë Grubeshiq.

Ai sugjeron se një nismë më e madhe e SHBA-së mund të sjellë rezultate më të mira sesa qendrimi i BE dhe thekson se nuk pret shumë nga Brukseli dhe negociatorët e tij.

“Nga vetë Bashkimi Evropian dhe negociatorët e tij të imponuar, mund të presim vetëm fjalë boshe që nuk do të mbështeten me asgjë”, përfundon ai.