Iraku nuk e ndryshon qëndrimin për mosnjohjen e Kosovës

Sekretari i përgjithshëm i Ministrisë së Punëve të Jashtme të Serbisë, Dushan Kozarev, u takua sot me ushtruese detyre të ambasadës së Irakut në Beograd, Majda Abul Jasen el Adami, e cila konfirmoi mbështetjen e fuqishme të Irakut për Serbinë në lidhje me çështjen e Kosovës.

Kozarev dhe El Adami diskutuan për forcimin e lidhjeve ndërmjet dy vendeve dhe konstatuan se marrëdhëniet janë miqësore dhe të bazuara në mirëkuptim shumëvjeçar dhe respektim të ndërsjellë të përkushtimit ndaj një politike shtetërore të pavarur dhe të orientuar nga interesat e veta në një arenë globale komplekse.

Pala irakiane përsëriti mbështetjen e fuqishme për Serbinë sa i përket Kosovës dhe Metohisë, dhe u theksua gjithashtu gatishmëria për vazhdimin e mbështetjes reciproke në të gjitha fushat me rëndësi të përbashkët, njoftoi Ministria e Punëve të Jashtme e Serbisë.

Kozarev e njoftoi bashkëbiseduesen për gjendjen në rajon, veçanërisht për ngjarjet në Bosnje dhe Hercegovinë.

Duke folur për ngjarjet e brendshme në Serbi, veçanërisht në Kosovë, ai vuri në dukje represionin e regjimit të Albin Kurtit ndaj popullatës serbe, ndërsa një pjesë e bisedës iu kushtua tentativës për “revolucion me ngjyrë” dhe kufizimit të papranueshëm të punës së RTS-së.

Sa i përket bashkëpunimit, u vunë në dukje mundësitë për konsolidim shtesë të tij në fushën e kulturës, ekonomisë dhe sigurisë, ndërsa në takimin e sotëm u shkëmbyen ftesat për ekspozitën e specializuar ndërkombëtare Expo 2027 të organizuar nga Beogradi dhe për Panairin Ndërkombëtar të Bagdadit.

Biseda përfshinte edhe një ftesë për kompanitë serbe për të marrë pjesë në projektet e infrastrukturës në Irak.