Zulfaj kërkoi sërish në Bruksel statusin e vendit kandidat për Kosovën

Kryenegociatori i Kosovës për negociatat me Bashkimin Evropian, Jeton Zulfaj, kërkoi gjatë një takimi në Bruksel me përfaqësuesit diplomatikë të misioneve të përhershme të shteteve anëtare të BE-së, Komisionit Evropian dhe Shërbimit Evropian për Veprim të Jashtëm, që Kosovës t'i jepet statusi i vendit kandidat për anëtarësim në BE.

“Në prani të 30 diplomatëve nga Belgjika, Bullgaria, Kroacia, Çekia, Finlanda, Franca, Irlanda, Italia, Lituania, Luksemburgu, Holanda, Polonia dhe Suedia, si dhe përfaqësuesve të institucioneve kryesore të BE-së që marrin pjesë në vendimmarrje, kryenegociatori Zulfaj prezantoi përparimin e Kosovës dhe kërkoi hapa konkretë drejt marrjes së statusit të vendit kandidat për anëtarësim në BE”, thuhet në njoftimin e publikuar në Facebook.

Zulfaj përcolli përkushtimin e qeverisë dhe institucioneve të Kosovës për zbatimin e Agjendës së Reformave, ndërsa në takim u shqyrtuan përparimi dhe sfidat në rrugën evropiane.

“Pa i anashkaluar sfidat në këtë proces, kryenegociatori theksoi se pozita aktuale e Kosovës, e cila ka statusin e kandidatit potencial, nuk pasqyron përparimin që vendi ka arritur në krahasim me shtetet e tjera të rajonit. Kosova renditet lart në indekse të ndryshme ndërkombëtare që matin përparimin demokratik dhe zhvillimin ekonomik”, thuhet më tej në njoftim.

Në takimin në Bruksel mori pjesë edhe kryenegociatori i Prishtinës në dialogun me Beogradin, Agron Bajrami.