Macut me zyrtarin e OKB-së: Serbia e vlerëson rolin e UNMIK-ut në mbrojtjen e serbëve, por ka hapësirë për veprim më aktiv

Kryeministri i Serbisë, Gjuro Macut, deklaroi sot në bisedën me nënsekretarin e Kombeve të Bashkuara për operacionet paqeruajtëse, Jean-Pierre Lacroix, se Serbia e vlerëson rolin që UNMIK-u ka në mbrojtjen e popullsisë jo-shqiptare, veçanërisht të serbëve në Kosovë, por se në këtë fushë ka ende shumë hapësirë për një angazhim më aktiv të misionit.

Lacroix konfirmoi se OKB-ja ofron mbështetje të plotë dhe të vazhdueshme për dialogun ndërmjet Beogradit dhe Prishtinës dhe u pajtua me kryeministrin se dialogu konstruktiv është e vetmja rrugë drejt stabilitetit të qëndrueshëm.

Lacroix i shprehu Macutit ngushëllimet e sinqerta për vdekjen e pjesëtarit të Ushtrisë së Serbisë, nënoficerit të lartë Milovan Jovanoviq, në misionin paqeruajtës të OKB-së në Liban më 4 qershor të këtij viti. Macut e falënderoi për këtë dhe theksoi se Serbia mbetet e përkushtuar ndaj pjesëmarrjes në misionet paqeruajtëse në mbarë botën, duke vazhduar traditën e ish-Jugosllavisë, e vendosur që në vitin 1967 me angazhimin e parë në misionin në Sinai.

Nënsekretari i OKB-së për operacionet paqeruajtëse është përgjegjës për menaxhimin strategjik përmes mbikëqyrjes dhe koordinimit të aktiviteteve të shumë misioneve të OKB-së në mbarë botën, përfshirë edhe UNMIK-un.

Gashiq me Lacroix: Serbia faktor stabiliteti në rajon

Me Lacroix u takua edhe ministri i Mbrojtjes i Serbisë, Bratislav Gashiq, i cili deklaroi se Serbia është faktor stabiliteti në rajon, e përkushtuar ndaj neutralitetit ushtarak dhe zhvillimit të marrëdhënieve të mira me të gjitha palët e interesuara, si dhe ruajtjes së integritetit territorial dhe sovranitetit si një nga interesat më të rëndësishme kombëtare. Ai theksoi se çështja e Kosovës mbetet prioritet i politikës së brendshme dhe të jashtme, si dhe sfida më e madhe politike dhe e sigurisë.

Gjatë takimit u diskutua edhe çështja e pranisë dhe veprimtarisë së UNMIK-ut në Kosovë, së bashku me forcat e KFOR-it, e cila, sipas Ministrisë së Mbrojtjes së Serbisë, ka rëndësi të veçantë për garantimin e sigurisë së popullsisë serbe dhe asaj jo-shqiptare.

Gashiq theksoi se çdo zgjidhje në kuadër të dialogut ndërmjet Beogradit dhe Prishtinës duhet të jetë në përputhje me Kushtetutën, Rezolutën 1244 të Këshillit të Sigurimit të OKB-së, Marrëveshjen Ushtarako-Teknike dhe dokumentet e tjera ndërkombëtare.

Nënsekretari i OKB-së për operacionet paqeruajtëse, Jean-Pierre Lacroix, vlerësoi se Serbia jep një kontribut të rëndësishëm në operacionet paqeruajtëse të Kombeve të Bashkuara dhe theksoi se është i vetëdijshëm për çmimin e lartë që Ushtria e Serbisë ka paguar në kontributin për paqen botërore, duke lavdëruar profesionalizmin e paqeruajtësve serbë.

Ai shprehu pritjen që partneriteti i suksesshëm të vazhdojë edhe në periudhën e ardhshme dhe siguroi se OKB-ja dhe UNMIK-u mbeten të përkushtuar jo vetëm ndaj zbatimit të mandatit të përcaktuar nga Rezoluta 1244 e Këshillit të Sigurimit, por edhe ndaj vlerave të përgjithshme të Kombeve të Bashkuara.

Gashiq theksoi gjithashtu se Serbia është një partner i parashikueshëm dhe i besueshëm i Kombeve të Bashkuara, i përkushtuar ndaj ruajtjes së paqes dhe stabilitetit në botë nën ombrellën e OKB-së. Ai shtoi se Serbia është e interesuar për thellimin e mëtejshëm të bashkëpunimit në kuadër të OKB-së, duke pasur parasysh se është një nga kontribuuesit më të rëndësishëm evropianë në operacionet paqeruajtëse dhe se në territorin e saj ndodhet UNMIK-u.

Ai shprehu mirënjohje ndaj nënsekretarit të OKB-së, ekipit të tij dhe Kombeve të Bashkuara për ngushëllimet e sinqerta pas humbjes së jetës së pjesëtarit të Ushtrisë së Serbisë, nënoficerit të lartë Milovan Jovanoviq.

Jovanoviq me Lacroix: Të ruhet roli i UNMIK-ut në Kosovë dhe shqyrtimi i rregullt i raporteve në KS të OKB-së

Në bisedën ndërmjet sekretarit shtetëror në Ministrinë e Punëve të Jashtme të Serbisë, Nevena Jovanoviq, dhe nënsekretarit të OKB-së, u theksua roli i rëndësishëm i UNMIK-ut në Kosovë dhe rëndësia e funksionimit të tij me kapacitet të pandryshuar, si dhe ruajtja e praktikës së shqyrtimit të rregullt të raporteve të këtij misioni në seancat e hapura të Këshillit të Sigurimit të OKB-së, njoftoi Ministria e Punëve të Jashtme e Serbisë.

Bashkëbiseduesit shkëmbyen mendime për rëndësinë e operacioneve paqeruajtëse të Kombeve të Bashkuara dhe kontributin e Serbisë në ruajtjen e paqes dhe sigurisë ndërkombëtare.

Jovanoviq theksoi se Serbia mbetet e përkushtuar ndaj multilateralizmit dhe bashkëpunimit me Kombet e Bashkuara, si dhe se do të vazhdojë të japë kontribut aktiv në misionet nën mandatin e OKB-së.

Në fund të bisedës, bashkëbiseduesit shprehën pritjen që marrëdhëniet partnere ndërmjet Serbisë dhe Kombeve të Bashkuara të zhvillohen më tej edhe në periudhën e ardhshme në të gjitha fushat me interes të përbashkët.