Nikolliq: Kurti po i shmanget AKS-së sepse do të ishte një mekanizëm për mbrojtjen e serbëve nga brenda

Kryetarja e Komisionit për Kosovën dhe Metohinë të Kuvendit të Serbisë, Danijella Nikolliq, vlerësoi sot se kryeministri i Kosovës në detyrë, Albin Kurti, i frikësohet Asociacionit të komunave serbe (AKS), jo sepse ai do të „cenonte funksionalitetin e Kosovës“, por sepse do t’ia kufizonte mundësinë për t’ua mbyllur serbëve institucionet dhe për të vendosur për jetën e tyre pa ta.

Nikolliq, në rrjetin social „X“, theksoi se AKS nuk është një kërkesë e djeshme e Beogradit dhe se për të është arritur marrëveshje me Marrëveshjen e Brukselit të vitit 2013, ndërsa kompetencat e tij janë përpunuar më tej në vitin 2015.

Me këto dokumente, siç theksoi ajo, është paraparë Asociacioni i komunave me shumicë serbe, me Statutin dhe organet e veta — Kuvendin, kryetarin, Këshillin dhe struktura të tjera — dhe është rënë dakord që AKS të ketë rol në fushat që janë jetike për mbijetesën e serbëve në Kosovë — arsim, shëndetësi, zhvillim ekonomik, mbrojtje sociale dhe planifikim urban e rural — si dhe në përfaqësimin e interesave të përbashkëta të anëtareve të tij para autoriteteve qendrore.

„Prandaj Kurti i shmanget AKS-së. Sepse AKS do të thotë që serbët nuk janë nënshtetas të cilëve Prishtina sot mund t’ua mbyllë një institucion, nesër t’ua ndryshojë një rregull, ndërsa pasnesër të vendosë se si do t’u funksionojë shkolla, shëndetësia apo vetëqeverisja lokale. Kurti tani thotë hapur se ‘AKS do të ishte një mekanizëm për të sfiduar funksionalitetin e Kosovës nga brenda’. Jo. AKS do të ishte një mekanizëm për mbrojtjen e serbëve nga brenda. Pikërisht për këtë arsye ai e refuzon me kaq këmbëngulje. Dhe ekziston edhe një fakt tjetër që nuk mund ta fshijë me asnjë retorikë politike: obligimi për formimin e AKS-së ekziston tashmë prej më shumë se 13 vjetësh“, deklaroi Nikolliq.

Ajo theksoi se edhe raportuesja e Asamblesë Parlamentare të Këshillit të Evropës në vitin 2024 kishte nënvizuar se themelimi i AKS-së duhet t’i shërbejë pjesëmarrjes më të madhe demokratike të qytetarëve dhe se nuk ka arsye për shtyrje të mëtejshme.

„Pra, problemi për Kurtin nuk është ‘funksionaliteti’. Problemi është se AKS do t’u jepte serbëve një zë institucional, mbrojtje kolektive dhe mundësinë që, për çështjet e mbijetesës së tyre, të mos varen ekskluzivisht nga vullneti i tij politik. Ndërsa 13 vjet të obligimit të papërmbushur tregojnë më së miri se kush në të vërtetë po i shmanget marrëveshjes, të drejtave dhe normalizimit“, theksoi kryetarja e Komisionit për Kosovën dhe Metohinë të Kuvendit të Serbisë, Danijella Nikolliq.

Kurti nuk i frikësohet AKS-së sepse ajo do të „cenonte funksionalitetin e Kosovës“, por sepse do t’ia kufizonte mundësinë për t’ua mbyllur serbëve institucionet dhe për të vendosur për jetën e tyre pa ta.
Kryeministri i Kosovës në detyrë, Albin Kurti, deklaroi në podkastin „Shtabi i Përgjithshëm – podkasti i gjeneralit Trinquant“ se Prishtina mbetet e përkushtuar ndaj normalizimit të marrëdhënieve me Serbinë, por vetëm me njohje të ndërsjellë, ndërsa hodhi poshtë formimin e Asociacionit të komunave serbe sipas modelit që, siç pretendon ai, e kërkon Beogradi.

Ai vlerësoi se Asociacioni do të kishte kompetenca të ngjashme me ato të Republikës Sërpska dhe do të përbënte një mekanizëm për të sfiduar funksionalitetin e Kosovës.