Petkoviq me Mingun: Mbyllja e qendrave për punë sociale rrezikon drejtpërdrejt 9.000 përfitues

Drejtori i Zyrës për Kosovë dhe Metohi, Petar Petkoviq, u takua sot me ambasadorin e Kinës në Serbi, Li Mingun, të cilin e informoi për situatën e rëndë të sigurisë dhe ekzistencës në të cilën gjendet populli serb në Kosovë që nga ardhja në pushtet e Albin Kurtit. Petkoviq theksoi mbylljen e fundit të qendrave serbe për punë sociale në veri të Kosovës dhe u ndal edhe te "përpjekjet për të ndryshuar vullnetin zgjedhor të popullit serb në krahinë".

Sipas fjalëve të Petkoviqit, mbyllja e qendrave për punë sociale është një goditje ndaj kategorive më të ndjeshme dhe më të rrezikuara të serbëve në Kosovë, duke çuar në rrezik të drejtpërdrejtë gati 9.000 përfitues të ndihmës sociale, shtesave për fëmijë, ndihmave të njëhershme, kujdesit dhe asistencës nga persona të tjerë, të cilët varen nga këto të ardhura për mbijetesë.

Ai kujtoi se në të njëjtën mënyrë autoritetet e Prishtinës kanë mbyllur institucionet serbe në të gjithë territorin e Kosovës, pikërisht ato që, sipas tij, duhet të ishin baza për krijimin e Bashkësisë së Komunave Serbe, të cilin autoritetet në Prishtinë refuzojnë ta formojnë për më shumë se 11 vjet.

"Mbyllja e institucioneve serbe në territorin e Kosovës dhe Metohisë nga autoritetet e Prishtinës çon në krijimin e kushteve të padurueshme për jetën e popullit serb në Kosovë dhe Metohi dhe në dëbimin e tyre përfundimtar nga krahina, me qëllim krijimin e një Kosove dhe Metohie etnikisht të pastër, që është synimi dhe aspirata e hapur e Albin Kurtit", theksoi Petar Petkoviq.

Drejtori i Zyrës për Kosovë dhe Metohi e njoftoi bashkëbiseduesin se delegacioni serb ka marrë pjesë në manifestimin në kuadër të segmentit të nivelit të lartë të sesionit të 58-të të Këshillit për të Drejtat e Njeriut, i cili u mbajt në selinë e OKB-së në Gjenevë, me praninë e një numri të madh të përfaqësuesve të shteteve anëtare të OKB-së.

Petkoviq i ka thënë bashkëbiseduesit se në këtë ngjarje është diskutuar konkretisht për shkeljen e të drejtave themelore të njeriut të serbëve në Kosovë dhe se për këtë kanë dëshmuar edhe viktimat e drejtpërdrejta të terrorit të regjimit në Prishtinë.

Petkoviq ia ka tërhequr vëmendjen bashkëbiseduesit edhe për “zhvillimet e çuditshme rreth numërimit të votave” pas zgjedhjeve parlamentare në Kosovë.

Duke pasur parasysh faktin se edhe pas njëzet ditësh nga zgjedhjet nuk kemi rezultate përfundimtare, sipas Petkoviqit, “ekziston shqetësimi i arsyeshëm se do të tentohet të rishkruhet rezultatet e zgjedhjeve në Kosovë dhe Metohi në dëm të Listës Serbe”.

Në fund të bisedës, Petkoviq shprehu mirënjohjen e tij për ambasadorin për mbështetjen e vazhdueshme të Republikës Popullore të Kinës për integritetin territorial dhe sovranitetin e Republikës së Serbisë dhe për këmbënguljen për gjetjen e një zgjidhjeje paqësore për çështjen e Kosovës, bazuar në Rezolutën 1244 të Këshillit të Sigurimit të OKB-së.