Petkoviq: Panik total në Prishtinë për shkak të bisedës mes Vuçiqit dhe Trumpit

Drejtori i Zyrës për Kosovë dhe Metohi, Petar Petkoviq ka konstatuar se vëmendja me të cilën mediat dhe politikanët e Prishtinës ndoqën bisedën mes presidentit serb Aleksandar Vuçiq dhe presidentit të zgjedhur të SHBA-së, Donald Trump, flet më së miri për shqetësimin dhe zilinë që mbretëronte në radhët e tyre.

“Vuçiq ishte ndër 10 liderët e parë botërorë me të cilët bisedoi Trump, që është një tregues i reputacionit të vendit tonë si dhe një shenjë e qartë e zhvillimit të vazhdueshëm të marrëdhënieve serbo-amerikane. Prandaj në Prishtinë ka panik total”, ka thënë Petkoviq në rrjetin social “X”.

Vuçiq dhe Trump kanë biseduar me telefon të dielën në mbrëmje.

Presidenti i Serbisë deklaroi sot se fakti që ai ishte në mesin e 15 liderëve të parë botërorë me të cilët bisedoi Trump ishte një sukses i madh për Serbinë.